COVID-19: Merekede Aqtóbe oblysynyń demalys oryndaryna baqylaý kúsheıtiledi
Ótken táýlikte óńirde bes adamnan koronavırýs ınfektsııasy anyqtaldy. Bári de Aqtóbe qalasynyń turǵyny. Vırýs juqtyrǵandar kún saıyn tirkelip otyrǵanmen, óńir áli de «jasyl aımaqta» ornalasqan. Jalpy pandemııa bastalǵaly óńirde 3634 adamnan COVID-19 anyqtaldy. Olardyń 96 paıyzy jazyldy. Qazirgi kezde 200-den astam adam úı karantıninde jatyr.
Oblys ákiminiń birinshi orynbasary Nurjaýǵan Qalaýovtyń aıtýynsha, daıyndalǵan tósek-orynnyń 17 paıyzynda qazir naýqastar em qabyldap jatyr.
«Jaǵdaı kún saıyn saraptalyp otyr. Negizi koronavırýs ınfektsııasynyń syrttan ákelinip jatqany baıqalady. Kóbi profılaktıkalyq tekserý kezinde tirkelgen. 6 qazannan beri «Jaısań», «Álimbet» shekara beketteri men áýe qatynasy arqyly shetelden 46 myńnan astam adam kelse, olardyń 4500-inde PTR-testiniń nátıjesi bolmaǵan. Olar karantındik statsıonarlarǵa ornalastyryldy. Barlyǵy 40 adamnan koronavırýs anyqtaldy», - dedi Nurjaýǵan Qalaýov.
Óńirde 47 baqylaý toby bar. Búginge deıin olar 9 myńǵa jýyq reıd ótkizdi. Barlyǵy 1806 zańbuzýshyq anyqtalyp, 1235 ákimshilik materıal qaraldy. Sanıtarlyq talapty saqtamaǵandarǵa 168,9 mln teńge aıyppul salyndy.
Bul rette, Nurjaýǵan Qalaýov baqylaý toptarynyń jumysyn synǵa aldy.
«1-22 jeltoqsan aralyǵynda 442 reıd júrgizildi. Nebári 172 aıyppul salynǵan. Qalada zańbuzýshylyqtyń kóp ekenin eskersek, bul tómen kórsetkish. Mobıldi toptar jańajyldyq merekelerge baılanysty óz mindetterine jaýapkershilikpen qaraýy kerek. Óıtkeni ujymdyq is-sharalarǵa arnalǵan úlken jarnama naýqany bastaldy. Keıbir kóńil kóteretin oryndar buryn salynǵan aıyppuldaryna qaramastan óz jumystaryn jalǵastyryp otyr. Soǵan baılanysty Sanıtarııalyq-epıdemıologııalyq baqylaý departamentiniń jumysyn jandandyrý kerek. 16 qarasha men 8 jeltoqsan aralyǵynda karantın rejımin buzǵan 27 derek anyqtaldy. Kóńil kóterý oryndardyń jumysyn toqtatý týraly buıryq jiberildi. Alaıda bir de bir dámhana nemese meıramhana jabylǵan joq»,- dedi oblys ákiminiń birinshi orynbasary.
Óńir basshysy Ońdasyn Orazalın Aqtóbe qalasynyń ákimdigine mereke kúnderi 11 baqylaý tobynyń jumysyn kúsheıtýdi tapsyrdy. Sanıtarııalyq-epıdemıologııalyq baqylaý departamenti ókilderine karantın tártibin buzǵandardy anyqtaý jumystaryna qatysty eskertý berdi.
«Kásipkerlermen túsindirý jumystaryn júrgizińizder. Biz bıznesti qoldaımyz, biraq olar kishkene shydaı turýy kerek. Jeke bas jaýapkshiligin sezinýi tıis. Eger barlyq talapty buzyp, jumys isteı beretin bolsa, keseldiń órshýine jol beredi. Osynyń aldyn alý kerek», - dep atap ótti oblys ákimi.
Óz kezeginde Aqtóbe oblystyq Sanıtarııalyq-epıdemıologııalyq baqylaý departamentiniń baspasóz qyzmeti túsindirý jumysyn bastady. 25 jeltoqsannan 2021 jyldyń 5 qańtaryna deıin oıyn-saýyq, sporttyq jáne basqa da kópshilik qatysatyn is-sharalardy, onyń ishinde jańajyldyq erteńgilikter men merekelik korporatıvterdi ótkizýge tyıym salynatynyn eskertti.
«Jergilikti atqarýshy organdar janynan uıymdastyrylǵan mobıldi toptar tarapynan kásipkerlik obektilerinde karantındik sharalardy saqtaý boıynsha monıtorıng kúsheıtiletinin eske salamyz», - dep jazylǵan ákimdik habarlamasynda.