COVID-19: Qytaı vaktsınany synaqtan ótkizýge kiristi
Bul rette indetke shaldyqqan 86 adam shetelden kelgen. Koronavırýsty elge syrttan ákelý jaǵdaılarynyń jalpy sany 1,4 myńnan asty. Qazirgi kezde 905 adam emdelip jatyr, 37 patsıent aýyr halde.
Budan basqa, sońǵy táýlikte aýrý belgileri bolmaǵan 54 jańa oqıǵa anyqtaldy. Jalpy alǵanda, 1 myńnan astam adam medıtsınalyq baqylaýda qalyp otyr.
Sońǵy málimetter boıynsha, QHR-da koronavırýsqa shaldyǵýdyń barlyǵy 82 249 oqıǵasy rastalǵan, aýrýdan 3341 adam qaıtys boldy, 77 738 adam jazylyp, aýrýhanadan shyǵaryldy. Qazirgi kezde 1170 patsıent medıtsınalyq mekemelerde em qabyldap jatyr, 116 naýqastyń jaǵdaıy aýyr dep baǵalanýda.
Jergilikti BAQ-tyń habarlaýynsha, Qytaı bıligi COVID-19 indetine qarsy aktıvtelgen vaktsınany klınıkalyq synaqtan ótkizýge ruqsat bergen. Ol klınıkalyq synaqtardan ótip jatqan eldegi ekinshi jáne álemdegi úshinshi vaktsına bolmaq.
Bul vaktsınany tıisti synaqtardan ótkizýge lıtsenzııany Ýhan bıologııalyq preparattardy zertteý ınstıtýty men Beıjińdegi Sinovac R&D ǵylymı-zertteý kompanııasy berdi.
Eske sala keteıik, Qytaıda vaktsınalar bes baǵyt boıynsha ázirlený ústinde: nýkleın qyshqyldary negizindegi gen-ınjenerlik vaktsına, ınaktıvtelgen vaktsına, qaıta uıymdastyrylǵan aqýyzdar negizindegi vaktsına, rekombınantty adenovırýstyq vektor negizindegi vaktsına jáne tumaýǵa qarsy tiri vaktsına.
Buǵan deıin jańa tıptegi koronavırýsqa qarsy rekombınatty adenovırýstyq vektor negizindegi vaktsınany klınıkalyq zertteý úshin tıisti ruqsatty QHR Áskerı-medıtsınalyq akademııasy alǵan.
Qazaqstanmen shekaradaǵy jaǵdaı
Qytaıda koronavırýsty syrttan ákelý oqıǵalarynyń kóbeıýine baılanysty Shyńjań-Uıǵyr avtonomııalyq aımaǵyndaǵy «Alashańqaı» baqylaý-ótkizý beketinde kedendik jáne shekaralyq baqylaý kúsheıtilgen, dep habarlaıdy «Sınhýa» agenttigi.
QHR ShUAA-ǵa «Alashańqaı» arqyly ótetin barlyq adamdar densaýlyq jaǵdaıy týraly deklaratsııany usynýǵa mindetti. Adamdardyń dene temperatýrasy únemi ólshenip, kólik quraldary dezınfektsııalanyp turady.