COVID-19: Qazaqstandyq vaktsına klınıkalyq zertteýleriniń II kezeńi aıaqtaldy
Almaty qalasyna jumys sapary aıasynda Eraly Toǵjanov aǵymdaǵy jyldyń qazan aıynda paıdalanýǵa berilgen qalalyq klınıkalyq balalar ınfektsııalyq aýrýhanasynyń modýldik fılıalyna bardy.
Almaty ákiminiń orynbasary Erjan Babaqumarov COVID-19 jaǵdaıynda jumys isteý úshin densaýlyq saqtaý júıesi ınfraqurylymynyń daıyndyǵy týraly baıandady. Qalada búginde 7 011 tósek-orynǵa arnalǵan 23 statsıonarda, 74 emhana bazasynda patsıentterdi kóshpeli (jyljymaly túrde) monıtorıngteý úshin 298 mobıldi brıgada jumys isteıdi, sondaı-aq jedel medıtsınalyq járdem jumysy men naýqastardy baǵyttaý jańa algorıtmderge aýystyryldy.
Sonymen qatar, klınıkalardyń materıaldyq-tehnıkalyq bazasy nyǵaıtyldy. Almaty qalasy Qoǵamdyq densaýlyq basqarmasy basshysynyń orynbasary Janar Madeevanyń aıtýynsha, uıymdardy medıtsınalyq jabdyqpen jabdyqtaýdy jańǵyrtý baǵdarlamasy aıasynda 74 statsıonar men klınıka úshin 4200-den astam jabdyq satyp alyndy. Sondaı-aq, birinshi eshelondaǵy statsıonarlardy medıtsınalyq gazdardyń, onyń ishinde otteginiń ortalyqtandyrylǵan júıesimen qamtamasyz etý jónindegi jalpyqalalyq baǵdarlama iske asyrylýda. Qalanyń medıtsınalyq uıymdaryndaǵy káriz sýlarynyń bıologııalyq qaýipsizdigi rejımi engizildi. Medıtsınalyq qaldyqtardy kádege jaratýdy baqylaý kúsheıtildi.
Vıtse-premerge jańa modýldik ınfektsııalyq statsıonar 300 tósekke eseptelgendigi baıandaldy. Almaty qalasynyń ınfektsııalyq balalar aýrýhanasynyń bas dárigeri Erjan Seralın statsıonarda barlyǵy 320 medıtsına qyzmetkeri jumys isteıtinin málim etti. 8 bólimshe, onyń ishinde bokstalǵan palatalary bar 2 blok qarastyrylǵan. Jansaqtaý bóliminde - 30 tósek, PTR-zerthanasy bar bólimshe, sondaı-aq ár palatada ylǵaldandyrylǵan ottegi bar (16 tonna suıyq ottegi, 8 tonnadan quıylǵany tur). Jansaqtaý jáne qabyldaý bólimshesinde gazdyń 3 túri júrgizilgen.
Óz kezeginde «Respýblıkalyq elektrondyq densaýlyq saqtaý ortalyǵy» ShJQ RMK Almaty qalalyq fılıalynyń dırektory Gúlnar Ysqaqova jedel áreket etý jáne basqarý úshin qaladaǵy epıdemııalyq jaǵdaıǵa onlaın monıtorıng júrgizýge baǵyttalǵan tsıfrlyq ákimshilendirýdiń jańa quraldaryn kórsetti.
Nysandy aralaý kezinde QR Premer-Mınıstriniń orynbasary Eraly Toǵjanov táýekel tobyndaǵy adamdarmen jumys jeke júrgizilýi tıis ekenin atap ótti. Olardy aýrýhanaǵa jatqyzý birinshi kezekte júzege asyrylýy tıis. Sonymen qatar, testileý jáne vaktsınatsııa máselelerine nazar aýdaryldy. Aýrýhananyń modýldik fılıalynyń aýmaǵynda zerthana bólimshesi bar, onda COVID-19-ǵa 2 myńǵa deıin PTR zertteý júzege asyrylady. Ony 5 myńǵa deıin ulǵaıtý josparlanýda.
Eraly Toǵjanov jumys sapary aıasynda qazaqstandyq vaktsınanyń klınıkalyq zertteýleriniń I kezeńi aıaqtalǵanyn atap ótti. Óz kezeginde, zertteýdiń II kezeńi boıynsha aralyq esepke sáıkes vaktsına joǵary tıimdilikti kórsetken.
Qazirgi ýaqytta QR Bilim mınıstrliginiń Bıologııalyq qaýipsizdik problemalarynyń ǵylymı-zertteý ınstıtýty QR Densaýlyq saqtaý mınıstrligimen birlesip zertteýdiń III kezeńi úshin daıyndyq jumystaryna kiristi.