COVID-19: Qazaqstan men álem elderiniń áýe kompanııalary qandaı shyǵynǵa ushyraýda
NUR-SULTAN. QazAqparat –COVID-19 pandemııasyna baılanysty Qazaqstannyń áýe kompanııalary qandaı shyǵynǵa ushyrap jatqany jarııalandy, dep habarlaıdy QazAqparat.
Energyprom keltirgen boljamǵa súıensek, áýe baǵytyndaǵy saparlardyń shektelýine baılanysty otandyq áýe kompanııalary 235 mlrd teńge, al áýejaılar 24,5 mlrd teńge, «Qazaeronavıgatsııa» 28 mlrd teńge joǵaltqan.
«COVID-19 pandemııasy bizdiń eldiń de, álemniń de kóliktik-logıstıkalyq sektoryna úlken soqqy jasady. Máselen qazaqstandyq áýe kompanııalardyń naýryz aıyndaǵy jolaýshylar tasymaly 2019 jyldyń naýryzyndaǵy kórsetkishimen salystyrǵanda 32,4 paıyzǵa, al osy jyldyń aqpan aıynyń kórsetkishimen salystyrǵanda 34,6 paıyzǵa, ıaǵnı 394,57 myń jolaýshyǵa azaıǵan», - dep jazady Energyprom .
Áýe kólikteri úshin jolaýshylar aınalymy naýryz aıynda 46,1 paıyzǵa (ótken jyldyń naýryz aıymen salystyrǵanda), al aqpan aıymen salystyrǵanda 41,6 paıyzǵa quldyraǵan. QR IIDM Azamattyq avıatsııa komıtetiniń málimetine sáıkes Qazaqstanda koronavırýstyń keń etek alýyna jol bermeý úshin 97 halyqaralyq baǵyt boıynsha reısterdi aptasyna 438-ge deıin (nemese 97 paıyzǵa) qysqartylǵan.
Sonymen qatar, ishki turaqty reısterdiń bárin de toqtatý týraly sheshim qabyldanǵan. Qazirgi ýaqytta el aýmaǵynda turaqty áýe qatynastary múlde joq.
«2020 jyldyń 22 naýryzyna deıin ishki 45 baǵyt boıynsha aptasyna 540 reıs (kúnine 77 reıs) oryndalyp kelgen edi. Alaıda 2020 jyldyń 2 sáýirine qaraı Qazaqstannyń qalalary arasyndaǵy turaqty reısterdiń bári toqtatyldy. Halyqaralyq azamattyq avıatsııa uıymynyń (IKAO) boljamyna sensek, 2020 jyldyń alǵashqy jartyjyldyǵynda áýe kompanııalary usynatyn kreslolardyń sany 51 paıyzǵa azaıady. Sonymen qatar tasymaldanatyn jolaýshylardyń sany 500 mln adamǵa qysqarady. Áýe kompanııalarynyń operatsııalyq shyǵyndary 124 mlrd AQSh dollaryna teńesedi. Al Halyqaralyq áýe kóligi qaýymdastyǵy (ІATA) jolaýshylarǵa baılanysty sala shyǵyny 2020 jylǵa qaraı shamamen 252 mlrd AQSh dollaryna jetetinin boljap otyr», - delingen habarlamada.
Boljamdy málimetterge súıensek Qazaqstanda ákelingen jolaýshylardyń sany naýryz-sáýir aılarynda 70 paıyzǵa azaıady.
