COVID-19 ınfektsııasynyń baryna kúmán keltirgender kóshede qydyryp júr – Ómirzaq Shókeev
TÚRKІSTAN. QazAqparat – Túrkistan oblysynda búgingi epıdemıologııalyq ahýalǵa baılanysty karantın rejımi 8 maýsymǵa deıin uzartylyp, óńirde birqatar shekteýler saqtalatyn boldy. Bul týraly Túrkistan oblysynyń ákimi Ómirzaq Shókeev onlaın-brıfıngte málimdedi, dep habarlaıdy QazAqparat tilshisi.
Aımaq basshysynyń sózinshe, dárigerler qaýymy kún-tún demeı vırýsty jeńý jolynda eńbek etýde.
«Oblys aýmaǵynda da 300-den asa adam aýyryp, dárigerlerdiń arqasynda 180-ge jýyq naýqas dertinen jazylyp otbasyna oraldy. Ókinishke qaraı, COVID-19 ınfektsııasynyń baryna kúmán keltiretin adamdar kóshede qydyryp, týǵan-týysynyń úıine barýda. Balalar aýlalarda birge oınap, bir-birimen tyǵyz baılanysta júr. Bul durys emes. Atalǵan vırýs qazir oblys kóleminde, ár aýdanda keńinen tarap barady. Aldyn almasaq, saldary jaman bolmaq. Balalarǵa juqqan aýrý onyń boıynda bilinbegenmen, úlken qarııalarǵa juqsa, olarǵa óte aýyr tıedi. Otbasymyzdyń, týǵan-týystyń, ata-anamyzdyń amandyǵyn oılasaq áli de karantın rejımin saqtaýymyz qajet. Karantın talaptaryn saqtamaǵandarǵa aıyppul salynady. Quqyq qorǵaý organdaryna arnaıy jınalys jasap, tapsyrdym. Zańǵa baǵynbaǵan kásipkerlerge jaza qoldaný kerek», dedi Ómirzaq Shókeev.
Atap óteıik, sońǵy aqparatqa sáıkes, oblysta koronavırýstyq ınfektsııanyń rastalǵan 337 jaǵdaıy tirkelgen. Onyń ishinde 187 adam qazirgi tańda aýrýynan aıyǵyp, úılerine oralǵan.
