COVID-19: Elordadan qazan aıynan beri sheteldik 15 adam deportatsııalandy
NUR-SULTAN. QazAqparat – Nur-Sultan qalasynyń bas sanıtarlyq dárigeri Janna Pralıeva elordada koronavırýs juqtyrǵan azamattardy ýaqtyly anyqtaý jumystary burynǵysha júrgizilip jatqanyn málim etti, dep habarlaıdy QazAqparat tilshisi.
«Koronavırýs juqtyrǵan azamattardy ýaqtyly anyqtaý maqsatynda PTR anyqtamasynsyz kelgen adamdar karantındik statsıonarǵa jatqyzylyp, olar qatań túrde tekserilip jatyr. Osy jyldyń 2 qazany men 10 jeltoqsany aralyǵynda 283 reıspen astanaǵa 35 450 adam keldi. Onyń ishinde teris PTR nátıjesi bar anyqtamamen 30 767 azamat jetti. Deportatsııalanǵandardyń sany 15. Karantındik statsıonarǵa jatqyzylǵandar jáne tekserilder – 4668. 22 sımptomsyz naýqas anyqtalyp onyń 4-i emdeýge jatqyzyldy», - dedi Janna Pralıeva Nur-Sultan qalasy ákimdiginiń baspasóz ortalyǵynda.
Onyń aıtýynsha avtoótpe joldar arqyly basqa elderden kelgen adamdardyń densaýlyq jaǵdaıyna monıtorıng júrgizilýde. Qazan aıynan bastap elordaǵa avtoótpe joldar arqyly barlyǵy 4197 adam kelgen. Onyń ishinde avtoótpe joldar arqyly ótkenderdiń ishinen COVID-19 vırýsyn juqtyrýdyń 6 jaǵdaıy júk tasymaldaýshylar arasynda tirkelgen.
