COVID-19 ekinshi tolqyny kezinde Pavlodardaǵy aýrýhanalar óz beıini boıynsha jumysyn jalǵastyrady
PAVLODAR. QazAqparat - COVID-19-dyń ekinshi tolqyny kezinde Pavlodardaǵy aýrýhanalar óziniń kóp beıindiligin saqtaıdy jáne josparly medıtsınalyq kómek kórsetetin bolady. Bul týraly «Dostyq úıinde» oblys ákimi Ábilqaıyr Sqaqov qatysýymen ótken qoǵamdyq keńestiń kezekti jumys kezdesýinde aıtyldy, dep habarlaıdy QazAqparat Pavlodar oblysy ákiminiń baspasóz qyzmetine silteme jasap.
Keńes otyrysy barysynda qylmysqa qarsy kúres máselesi qaraldy. Pavlodar oblysy polıtsııa departamentiniń bastyǵy Nurlan Másimov búginde óńirde urlyq pen alaıaqtyq faktileri jıi tirkeletinin atap ótti. Sonymen qatar, oblysta ýchaskelik ınspektorlar jetispeıdi. Qalalar men aýdandarda qazir 291 ınspektor jumys isteıdi. Taǵy 98 ýchaskelik ınspektor qajet. Polıtsııa qyzmetiniń osy jáne basqa da máseleleri, sonyń ishinde oblystyq bıýdjet qarajaty esebinen de sheshiledi.
- Bıýdjetti naqtylaǵan saıyn quqyq qorǵaý organdaryna materıaldyq qoldaý kórsetilip keldi. Búgingi tańda bizdiń aldymyzda árdaıym zamanaýı standarttarǵa saı kele bermeıtin patrýldik-kúzet qyzmetteri men tirek pýnktterimizdi tsıfrlaý mindeti tur. Tek kóshelerde ǵana emes, mektepterdiń janynda, bizdiń qalalar men aýdandardyń aýlalary men shet jaǵyndaǵy qaýipsizdikti qamtamasyz etý mańyzdy. Sonda ǵana bizdiń ishki ister organdary turǵyndarmen jumys isteýdiń servıstik modeline kóshedi, - dep atap ótti Pavlodar oblysynyń ákimi.
Kezdesýde densaýlyq saqtaý máseleleri de talqylandy. Qoǵamdyq keńes múshesi Sergeı Gýlıaev koronavırýsqa qarsy kúreske baılanysty júıeniń jumys júktemesiniń kóptiginen josparly medıtsınalyq kómekke muqtaj óńir turǵyndary qaraýsyz qalyp qoımaýyna nazar aýdardy. Densaýlyq saqtaý basqarmasy basshysynyń mindetin atqarýshy Aıdar Seıitqazınov oblystaǵy eń iri medıtsınalyq ortalyqtardyń biri - kardıologııalyq ortalyq jáne onkodıspanser josparly kómek kórsetý úshin beıindiligin saqtaıtynyn atap ótti.
«Pavlodar qalasynyń № 1 aýrýhanasy shuǵyl kómek kórsetý úshin qalady, Ǵ. Sultanov atyndaǵy oblystyq klınıkalyq aýrýhana jáne №3 qalalyq aýrýhana óziniń kóp beıindiligin saqtaıdy jáne josparly medıtsınalyq kómek kórsetetin bolady. COVID-19-dyń alǵashqy tolqyny kezinde emhanalar jumysyn toqtatyp, olardyń qyzmetkerleri provızorlyq jáne ınfektsııalyq statsıonarlarǵa aýystyrylsa, bul joly olar óz beıini boıynsha jumys isteıtin bolady. Ol úshin mobıldi brıgadalar quryldy, tikeleı emhanalarǵa kelip túsetin patsıentter úshin súzgiler, «taza» jáne «las» aımaqtar kózdelgen», - dedi ol.
Pavlodar oblysy qoǵamdyq keńesiniń tóraǵasy Nurlan Nábıev atap ótkendeı, óńirdegi koronavırýs ınfektsııasynyń alǵashqy tolqynynan keıin qabyldanǵan sharalar belgili bir úmit otyn jaǵyp otyr.
«Bıyl kóktem men jazda bolǵan jaǵdaıǵa eshkim daıyn bolǵan joq, - dep atap ótti qoǵamdyq keńes basshysy. - Búgingi tańda bizdiń medıtsınalyq qoǵamdastyq qalaı jumys isteý kerektigin biledi jáne eń bastysy, onyń barlyq áreketteri tehnıkalyq jáne materıaldyq turǵydan nyǵaıtylǵan. Halyq bul baǵytta qandaı aýqymdy jumystar atqarylyp jatqanyn bilýi tıis. Qoǵamdyq keńes músheleri bul týraly oblys turǵyndaryn habardar etýi kerek dep oılaımyn».
Kezdesý sońynda qatysýshylar qoǵamdyq keńestiń jańa hatshysyn saılady. Keńes músheleri Pavlodar oblysynyń áleýmettik qorǵaý organdarynda uzaq ýaqyt eńbek etken Helýa Qashkenovanyń kandıdatýrasyna biraýyzdan daýys berdi.
