Covid-19-dan jazylyp shyqqandar qalaı tez ońala alady

ALMATY. QazAqparat – Almatyda Qytaı dárigerleri onlaın trenıng barysynda Covid-19 dertinen jazylyp shyqqandarǵa qalaı qalpyna kelý kerektigin túsindirdi, dep habarlaıdy QazAqparat tilshisi.

Іle Qazaq avtonomdy okrýginiń «Dostyq» aýrýhanasynyń dáriger pýlmonologi Tsıý Gaýnfeng koronavırýstan qozǵan pnevmonııadan keıin aǵzany ońaltý sharalaryn júrgizý mańyzdy ekendigin aıtty.

«Covid-19-dan jazylyp shyqqandar aǵzasy álsirep shyǵady. Olar kóbinese sál belsendilikten soń demigip qalady. Bulshyqetteri atrofııaǵa ushyraıdy. Sondyqtan ońaltý sharalary emdeýden anaǵurlym uzaq bolýy tıis. Eger patsıent basy aýyryp, basy aınalyp, keýde tusy shanshyp aýyryp, kóp jótelse, jattyǵýdy toqtatyp shuǵyl dárigerge habarlaýy kerek. Qytaı qalalarynan kelgen túrli málimetterdi qoryta kele biz jattyǵýlar keshenin oılastyrdyq. Bul jattyǵýlar negizinen jaǵdaıy aýyr, ortasha, jeńil patsıentterge arnalǵan. Negizinen bul bulshyqetterdi kúsheıtýge, tynys alýdy jeńildetýge, qan qysymyn jeńildetýge arnalǵan. Buǵan jyldam júristi, júgirýdi, júzýdi qosýǵa bolady. Jattyǵýlar bastapqyda baıaý, odan keıin jyldam bolýy tıis. Buǵan aptasyna 3-5 ret 30 mınýttan kem emes ýaqyt bólý kerek», - dedi maman.

Aıta ketý kerek, Covid-19 kúresip jatqan otandyq dárigerlerge kómek kórsetýge Almatyǵa Qytaıdan dárigerler delegatsııasy kelgen bolatyn.

Qazir mamandar S.Asfendııarov atyndaǵy Qazaq Ulttyq medıtsınalyq ýnıversıtetinde vıdeodáris oqyp jatyr.

Olardy tyńdaýǵa 700-den asa medıtsına mamany qosylǵan.