COVID-19-ben qatty aýyrǵan petropavldyq ınfektsııaǵa kópke deıin senbeı kelgenin aıtady
PETROPAVL. QazAqparat – Koronavırýsty juqtyryp, bir aıǵa jýyq qatty aýyrǵan Petropavl turǵyny Oksana Kropacheva basynan ótken jaǵdaıdy aıtyp berdi, dep habarlaıdy QazAqparat tilshisi.
Petropavldyń 35 jastaǵy turǵyny Oksana Kropachevanyń aıtýynsha, ol birinshi ret koronavırýsty 2020 jyldyń shilde aıynda juqtyrǵan.
«Biz qyzym ekeýimiz Ombydaǵy medıtsınalyq ortalyqtardyń birinde tekserilýimiz qajet boldy. Shekaradan PTR test nátıjesinsiz ótkizbedi. Al sol kezde bul testi jasatý qat edi. Men ótý úshin medıtsınalyq mekemelerge jıi baryp turdym, sol jerde juqtyrdym dep oılaımyn. Óıtkeni, onda men sııaqty kezek kútip júrgen adamdar kóp boldy», - deıdi Oksana Kropacheva.
Ol kezde aýrý jeńil ótip, áıel gazdalǵan sýsyndardyń jáne keı jemis-jıdektiń dámin sezbegen. Tapsyrǵan testii qyzy ekeýinde de oń nátıje kórsetip, eki aı úı karantıninde otyrady.
«Qarasha aıynda ekinshi ret aýyrdym. Aldymen búıregimniń qysymy kóterildi. Buǵan deıin búıregim múldem aýyrǵan emes. Ózimdi jaısyz sezindim. Búıregimniń qysymy túsisimen dene qyzýym kóterildi. Men otyryp-turýdan qaldym. Jótel bastaldy. Bir ereksheligi – jótelgende aýzymnan kóbik shyǵatyn. Dárigerdi shaqyryp, tekserile bastadym. Tekserýge qan ala almady, ol uıı berdi. Trombotsıttiń joǵary bolýynan, qan tamyrlary tarylyp, qan aınalymy nasharlady. Saldarynan basym aýyryp, janym kózime kórindi. Múldem dám, ıis sezýden qaldym. Sol sebepti tamaq ishe almadym, loqsyp, qusýmen boldym», - deıdi kelinshek.
Oksananyń tanysy sonyń aldynda ǵana koronavırýs juqtyryp, saldarynan búıregi jumys istemeı qalǵan eken. Kóp ýaqyt ótpeı komaǵa túsip, qaıtys bolǵan.
«Ne júre almaısyń, ne jata almaısyń, ne tamaq ishe almaısyń – bul óte qorqynyshty. Buǵan deıin jarty jyl boıy men koronavırýstyń bar ekenine, onyń qaýipti ekenine mán bermesem, aýyrǵanda bir aı esimdi jııa almadym. Onyń saldaryn áli tartyp kelem, qazirdiń ózinde maǵan demalý qıyn. Tamaǵym ise beredi, jótelden de tolyq qutylǵan joqpyn», - deıdi Petropavl turǵyny.
COVID-19-dy juqtyryp, qaýipti ınfektsııanyń bar zardabyn tartqan áıeldiń búginde turmys salty ózgergen. Jańa ádetterdi qalyptasyrýyna týra kelipti.
«Qazir qoǵamdyq oryndarda maskamdy tastamaımyn. Qolymdy sabyndap jýyp otyrýdy ádetke aınaldyrdym. Taýardy úıge jetkizip beretinderdiń qyzmetine júginýge tyrysamyn. Al dúkenge baratyn bolsam adam az ýaqytty tańdaımyn. Óıtkeni men qorqamyn. Men ólip qalsam balalarym ne isteıdi, ananyń ornyn eshkim baspaıdy. Áli kúnge deıin bul vırýstyń barlyǵyna senbeıtinder bar. Men de solardyń biri bolǵam. Bul – óte qorqynyshty aýrý, saqtansań saqtaımyn degen, sanıtarlyq talaptardy saqtaıyq», - deıdi Oksana Kropacheva.
