COVID-19: Áskerı dárigerler arnaıy daıarlyqtan ótti

ALMATY. QazAqparat- Almatydaǵy Qorǵanys mınıstrliginiń áskerı klınıkalyq gospıtalinde koronavırýstyń taralýy jaǵdaıynda medıtsına personaldaryn arnaıy taktıkalyq daıarlaý sabaǵy ótti, dep habarlaıdy QazAqparat tilshisi Qorǵanys mınıstrliginiń baspasóz qyzmetine silteme jasap.

Áskerı dárigerler is-qımyl tártibin qarap, qaýipti ınfektsııanyń belgileri nemese dıagnozy qoıylǵan kezde qyzmetkerlerge habarlaý syzbasyn pysyqtady.

Jappaı túsip jatqan naýqastardy alǵashqy bólý jáne ornalastyrý erejeleri, tekserý ádisteri erekshe nazarǵa alyndy. Bul máseleler basshylyq, dárigerler, medıtsına personaldarynyń praktıkalyq sabaǵynyń bir bóligi retinde jan-jaqty taldandy.

Sabaq barysynda ınfektsııanyń taralý qaýipsizdiginiń erejelerin saqtaý, jeke qorǵanys quraldaryn paıdalaný, juqtyrý aımaǵynda bolý jáne ol jerden shyqqandaǵy máseleler egjeı-tegjeıli pysyqtaldy.

Oqý-jattyǵýǵa qatysýshylar sondaı-aq, shuǵyl jaǵdaıda jınaqy jáne jedel jumys isteý, sanıtarlyq-epıdemıologııalyq normalardy qamtamasyz etý men naýqastarǵa sapaly medıtsınalyq kómek berýge qajetti kásiptik daıarlyqtyń joǵary deńgeıin kórsetti.