COVID-19: Almatylyqtarǵa birqatar keńes berildi
ALMATY. QazAqparat – Almaty qalasy boıynsha Taýarlar men qyzmetterdiń sapasy men qaýipsizdigin baqylaý departamenti basshysynyń orynbasary Murat Muhamedıarov turǵyndardy sanıtarlyq normalardy saqtaýǵa shaqyrdy, dep habarlaıdy QazAqparat tilishsi.
Ol almatylyqtarǵa maska rejımin, áleýmettik qashyqtyqty qatań saqtaýǵa keńes berdi. Sonymen qatar, JRVI belgileri paıda bolǵan kezde birden tirkelgen emhanaǵa júginý kerektigin eske saldy.
«Eger ózin jaısyz sezinip, emhanaǵa barý múmkindigi bolmasa, qazir bizde ýchaskelik dárigermen qashyqtan baılanysý múmkindigi bar. Dári-dármekti ózdigińizben taǵaıyndaý, áleýmettik jelilerden, tanystardan jáne taǵy basqa jerlerden alǵan usynystardy qoldaný usynylmaıdy. Óıtkeni ózin-ózi emdeý jaǵdaıdy qıyndata túsedi, tek dárigerdiń taǵaıyndaýy arqyly ǵana. Onyń ústine, qazir dárigerge barý jáne retsept jazǵyzyp alý múmkindigi jeńildedi. Sondyqtan bárinen áleýmettik qashyqtyqty saqtaýdy, respýblıkanyń jáne Almaty qalasynyń bas sanıtar dárigerleri bekitken sanıtarlyq normalarǵa beı-jaı qaramaýdy suraımyz», –dep atap ótti ol.
