Covid-19: Almatyda jańa bosanǵan áıel sábıimen birge aýrýhanadan shyqty
ALMATY. QazAqparat – Búgin Almatyda koronavırýs ınfektsııa rastalǵan 30 jastaǵy kelinshek saýyǵyp, emdeýden shyǵaryldy. Bul týraly qalalyq Qoǵamdyq densaýlyq saqtaý basqarmasy málim etti, dep habarlaıdy QazAqparat tilshisi.
2020 jyldyń 17 sáýirinde №1 Qalalyq klınıkalyq aýrýhanada vırýs juqtyrǵan 30 jastaǵy kelinshek salmaǵy 2,5 keli deni saý qyz balany dúnıege ákeldi.
Jańa týǵan sábıdi tekserý kezinde Covid-19 dıagnozy rastalmady. Náreste osy ýaqyt ishinde balalar bólimshesinde dárigerlerdiń qaraýynda boldy.
«Búgin men óz qyzymdy alǵash ret qolyma alyp otyrmyn. Meniń bosanǵanyma bir aı boldy. Ókinishke oraı, bul pandemııa maǵan da kelip jetti. Men 12 sáýirde juqpaly aýrýlar aýrýhanasynan osynda kelip túskende, ózimdi jaısyz sezingen bolatynmyn. Mende jótel, dene qyzýy, entigý boldy. Maǵan moraldyq turǵydan kómekteskeni úshin dárigerlerge úlken rahmet. Olar meni emdep qana qoımaı, meıirimmen qarap, maǵan rýhanı qoldaý kórsetti. Tek dárigerlerge ǵana emes, sondaı-aq meıirbıkelerge, sanıtarlarǵa da alǵys aıtqym keledi. Olardyń eńbegi zor. Qorǵanys kostıýmen júrý olar úshin ońaı emes, sonda da olar mindetin oryndaýda. Olar bizdiń densaýlyǵymyzdy jaqsartýǵa baryn salyp otyr», - dedi bólisti Jibek Júsipova.
Qazirgi ýaqytta ana men bala densaýlyǵynyń jaı-kúıi qanaǵattanarlyq dep baǵalanýda, endi olar úı karantıninde bolady.
Perzenthana dırektory Sábıt Pazylovtyń aıtýynsha, qazirgi ýaqytta perzenthanada Covid-19 vırýsy bar bosanǵan 5 áıel jatyr. Barlyq jańa týǵan nárestede taldaý teris nátıjeni kórsetken. Jaqyn arada olar da aýrýhanadan shyǵarylady.
«Qazir bizdiń aýrýhanamyz 442 tósek orynǵa arnalyp ashylǵan provızorlyq ortalyq. Ony ishinde 50 tósek – bizdiń perzenthanamyzda, onda Covid-19 dıagnozyna kúdikti ne rastalǵan júkti jáne bosanǵan áıelder jatyr. Bizdiń perzenthanamyz provızorlyq statsıonar retinde jumysyn 12 sáýirde bastady. Osy ýaqyttan beri bizdiń perzenthanamyzda karantındegi júzden astam júkti áıel emdeldi, 20 áıel bosandy, onyń 5-ýi rastalǵan dıagnozymen deni saý sábıdi dúnıege ákeldi», - dedi Sábıt Pazylov.
