COVID-19: Almatyda medıtsına mamandaryna zárýlik joq
ALMATY. QazAqparat – Almatyǵa Qytaı memleketinen dárigerler shaqyrýdyń qajetti joq. Bul týraly búgin qalalyq Qoǵamdyq densaýlyq saqtaý basqarmasy ókilderiniń BAQ ókilderine bergen onlaın jaýabynda aıtyldy, dep habarlaıdy QazAqparat tilshisi.
Quzyrly organ ókilderiniń aıtýynsha, Almatyda medıtsına qyzmetkerleri jeke qorǵanys quraldarymen (arnaıy kostıýmder, respıratorlar, maskalar), dezınfektsııalyq jáne antıseptıktermen jetkilikti mólsherde qamtamasyz etilgen. Medıtsına qyzmetkerleri jumysqa kirý jáne shyǵý kezinde termometrııadan ótip, epıdemııaǵa qarsy sharalardy qatań saqtaıdy.
Qazirgi ýaqytta medıtsına qyzmetkerleri arasynda vırýs juqtyrý faktileri anyqtalǵan joq.
Sonymen qatar, medıtsına mamandary arasynda tapshylyq joq.
«Qytaıdan eshqandaı dáriger shaqyrtqan joqpyz. Sebebi, oǵan qajettilik joq. Bizdiń dárigerlerdiń biliktiligi jetkilikti», - dedi baspasóz qyzmeti.
Almatyda kúndizgi statsıonar bólimsheler shtattyq rejimde jumys istep jatyr.
Emhanalarda múmkindikke qaraı keıbir qyzmet túrleri: dári retseptilerin jiberý, ýaqytsha eńbekke jaramsyzdyq týraly qujat, keńes berý, túsindirý jumystary onlaın formatqa aýysty.
Dárigerge jazylý burynǵy tártippen jalǵasady.
Josparly operatsııalar josparly túrde júrgiziledi. Arasynda ýaqyt ózgeristeri bolýy múmkin.
«Epıdemıologııalyq ahýal nasharlaǵan jaǵdaıda Almatyda qosymsha tósek oryndar jasaqtalady. Ázirge Almatyda provızorlyq klınıkalarda oryn jetkilikti», - dedi baspasóz qyzmetinen.
