Covid-19: Álemde jańa antırekord tirkeldi

JENEVA. QazAqparat - Sońǵy aptada álemde 21 mıllıonnan astam adam koronavırýsty juqtyrdy, bul pandemııa bastalǵaly bergi eń joǵary jańa kórsetkish, dep habarlaıdy QazAqparat.

Dúnıejúzilik densaýlyq saqtaý uıymy (DDSU) sársenbige qaraǵan túni koronavırýs juqtyrǵandar sany aldyńǵy jeti kúnmen salystyrǵanda 5%-ǵa, al ólim-jitim 1%-ǵa artqandyǵyn málimdedi.

17 qańtar men 23 qańtar aralyǵynda DDSU aptalyq bıýlleteni «ótken aptamen salystyrǵanda COVID-19 jańa jaǵdaılarynyń bes paıyzǵa artýyn» tirkedi - 21 362 288 adam koronavırýs juqtyrǵan. Jeti kún ishinde 49 890 naýqas qaıtys bolǵai, bul bir apta burynǵy kórsetkishten 1%-ǵa artyq.

Ótken aptamen salystyrǵanda (10-16 qańtar) juqtyrǵandar sanynyń artýy Shyǵys Jerorta teńizinde – 39%-ǵa, Ońtústik-Shyǵys Azııada (36%-ǵa) jáne Eýropada – 13%-ǵa artty. Eýropada bir aptada juqtyrǵandar sany 10 mıllıonnan asty jáne bul álemdegi barlyq jańa ınfektsııalardyń 47% quraıdy. Ólim, ásirese Ońtústik-Shyǵys Azııada - 44%-ǵa jáne Shyǵys Jerorta teńizinde - 15%-ǵa qatty ósti. Sonymen qatar Afrıkada, Batys Tynyq muhıt aımaǵynda jáne Eýropada sáıkesinshe 14%, 12% jáne 5% tómendedi.

Amerıka Qurama Shtattary bir aptadaǵy ınfektsııalardyń eń kóp sany týraly habarlady (4 215 852). Odan keıin Frantsııa (2 443 821), Úndistan (2 115 100), Italııa (1 231 741) jáne Brazılııa (824 279) keledi.

Dúnıejúzilik densaýlyq saqtaý uıymynyń málimetine sáıkes, 25 qańtardaǵy jaǵdaı boıynsha álemde pandemııa bastalǵannan beri 352 796 704 adam aýrý juqtyryp, 5 600 434 adam qaıtys bolǵan. Al ótken táýlikte 2 158 785 adamnyń indetke shaldyqqany jáne 6 189 adamnyń kóz jumǵany týraly habarlandy.