COVID-19: Aqtóbede jansaqtaý bólimderiniń teń jartysy toly
Óńirde bir táýlikte taǵy 387 adamnan koronavırýs ınfektsııasy anyqtaldy. Onyń kóbi derttiń sımptomdy túrine shaldyqqan. Ásirese Aqtóbe qalasyndaǵy jaǵdaı ýshyǵyp tur. Qazir Aqtóbe medıtsına ortalyǵyn ınfektsııalyq statsıonarǵa aınaldyrý máselesi qarastyrylyp jatyr.
«Qazir barlyǵy 1043 adam aýrýhanada jatyr. Onyń 780-i Aqtóbe qalasynda. Al aýdandardan Hromtaý, Qarǵaly, Qobda, Baıǵanınde naýqastar sany kóp. Naýqastardyń 95-i jansaqtaý bóliminde. Onyń 19-y ókpeni jasandy jeldetý apparatyna, 45-i ókpeni ınvazıvti emes jeldetý qurylǵysyna qosyldy. Balalar týraly aıtar bolsam, barlyǵy 344-i baqylaýda. Onyń 23-i aýrýhanada jatyr. Barlyǵynyń da jaǵdaıy ortasha aýyrlyqta. Sonymen birge 120 júkti kelinshekten koronavırýs ınfektsııasy anyqtalyp, onyń 41-i emdeý mekemesinde em qabyldap jatyr. Bireýiniń jaǵdaıy aýyr. Qazir oblys boıynsha ınfektsııalyq aýrýhanalar júktemesi 65, al jansaqtaý bóliminde 50% qurap otyr», - dedi oblystyq Densaýlyq saqtaý basqarmasy basshysynyń orynbasary Bekbolat Іzbasarov.
Onyń aıtýynsha, Aqtóbe qalasy boıynsha oblystyq ınfektsııalyq aýrýhana janyndaǵy Mamandandyrylǵan emdeý-saýyqtyrý ortalyǵy, Narkologııa dıspanseri jáne aýa-tamshylar bólimi bar. Oblystyq ftızıopýlmonologııalyq ortalyq pen «Shaǵala» saýyqtyrý ortalyǵy da vırýs juqtyrǵandardy emdep jatyr. Al júkti kelinshekter Aqtóbe medıtsına ortalyǵyndaǵy perzenthananyń ınfektsııalyq statsıonaryna ornalastyrylǵan. Temirjol aýrýhanasyndaǵy 200 tósek-oryn da qoldanyldy.
«Eger dál osy kúıde vırýs juqtyrǵandar aýrýhanaǵa tússe, Aqtóbe medıtsına ortalyǵynda ınfektsııalyq statsıonar ashylýy múmkin. Sol kezde josparly medıtsınalyq kómek ýaqytsha toqtatylady», - dedi Bekbolat Іzbasarov.
