COVID-19: Aqtóbede shekteý sharasy jeńildeýi múmkin
AQTÓBE. QazAqparat – Aqtóbede sońǵy táýlikte 7 adamnan koronavırýs ınfektsııasy anyqtaldy. Qazir epıdjaǵdaı turaqty. Tipti birqatar shekteý sharasy jeńildeýi múmkin, dep habarlaıdy QazAqparat tilshisi.
Ótken táýlikte óńirde 7 adamǵa COVID-19 dıagnozy qoıyldy. Onyń beseýi — Aqtóbe qalasynyń turǵyny. Al ekeýi Mártóktegi shekara beketinde tirkeldi. Jalpy, óńirde kúni búginge deıin 3377 jaǵdaı anyqtalsa, onyń 97 paıyzǵa jýyǵy jazyldy. Qazirgi kezde oblys boıynsha 378 adam úı karantıninde jatyr. Olardy dáriger óz baqylaýyna aldy. Mamandardyń aıtýynsha, Aqtóbe oblysy qazir «jasyl aımaqta».
«Aqtóbe oblysynyń bas memlekettik sanıtarlyq dárigeriniń jańa qaýlysy ázirlenip jatyr. Birqatar shekteý sharasy báseńdeýi múmkin. Ásirese oqýshy sany 300-den aspaıtyn mektepter ІІ-toqsannan bastap dástúrli bilim berý úrdisine kóshedi. Dál qazirgideı epıdjaǵdaı saqtalsa, shekteý jeńildeıdi. Tek araqashyqtyqty saqtap, maska taǵyp, antısektıp qoldanǵan jón. Egde jastaǵy adamdardyń kópshilik oryndarǵa barmaǵany durys», - dedi Aqtóbe oblysynyń memlekettik sanıtarııalyq-epıdemıologııalyq baqylaý departamenti basshysynyń mindetin atqarýshy Muhtar Serbaev.
Aıta keteıik, 6-qazanda shekaradan ótkenderge PTR test mindetteldi. Sodan beri shekaradan 18 myńnan astam adam ótip, 18 adamnan koronavırýs ınfektsııasy anyqtaldy.
«Qazir emdeý mekemelerinde 69 naýqas em qabyldap jatyr. Onyń 14-i ınfektsııalyq statsıonardaǵy dárigerler baqylaýynda. Pnevmonııadan em qabyldap jatqan 29 naýqas bar. Olar Aqtóbe qalasy men birneshe aýdandaǵy aýrýhanada jatyr. Ókpeni jasaldy jeldetý apparatyna qosylǵan eshkim joq», - dedi oblystyq densaýlyq saqtaý basqarmasy basshysynyń orynbasary Bekbolat Іzbasarov.
