COVID-19: Aqtóbede dıspanserlik esepte turǵandar tekseriledi
AQTÓBE. QazAqparat – Aqtóbe oblysynda dıspanserlik esepte turǵandar jappaı tekseriledi, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Keshe óńirde 2 adamnan koronavırýs ınfektsııasy anyqtaldy. Olardyń biri 58 jastaǵy áıel. Jótelip, dene qyzýy kóterilip, dáriger kómegine júgingen. Al ekinshisi 27 jastaǵy jigit. Ekeýi de Aqtóbe qalasynyń turǵyny. Qazir óńirde 3 287 adam vırýs juqtyrǵan bolsa, onyń 98 paıyzdan astamy jazyldy.
«Jaısań» jáne «Álimbet» beketteri arqyly kólikpen ótkender arasynda koronavırýs indeti tirkeldi. 6 qazannan beri tek «Jaısań» ótkizý beketi arqyly 9 myńnan astam adam ótti. Olardyń 3 700-i jolaýshy. Barlyǵy 1 190 adam karantın statsıonaryna ornalasyp, olardyń jeteýinen koronavırýs anyqtaldy. Shetelden áýe qatynasy arqyly kelgenderden aýrý anyqtalmady. Osyǵan baılanysty indettiń Reseıden kelý qaýpi bar»,- dedi oblys ákiminiń orynbasary Nurjaýǵan Qalaýov.
Dıspanserlik esepte turǵan árbir aqtóbelikti baqylaýǵa alý usynyldy. Bul jumys 152 mobıldi brıgadaǵa júkteledi. Qajet bolǵan kezde olardyń sany artatyn boldy. Aýdandar men Aqtóbe qalasynda jańa rentgen apparattary ornatylyp jatyr. Óńirdegi medıtsınalyq mekemelerge 117 ókpeni jasandy jeldetý apparaty satyp alyndy. Densaýlyq saqtaý mekemelerine 6 jyljymaly keshen ákelinedi.
Aıta keteıik, oblysta 32 baqylaý toby bar. Olar 1210 zańbuzýshylyqty anyqtady. 807 adam ákimshilik jazaǵa tartylyp, 101,2 mln teńge aıyppul salyndy.
«Barlyq baǵyttar boıynsha qoǵamdyq baqylaýdy kúsheıtip, anyqtalǵan kemshilikterdi joıý qajet. Eń tıimdi ádisterdi paıdalaný kerek. Bastysy indettiń órshýine jol bermeý. Turǵyndardyń 12% tumaýǵa qarsy egildi, bul qaýipti biraz seıiltedi», - dep atap ótti Ońdasyn Orazalın.
