Coursera platformasynda oqýǵa ótinim qabyldaýdyń aıaqtalýyna 3 kún qaldy

NUR-SULTAN. QazAqparat - Coursera iri bilim berý platformasynda tegin onlaın-oqýǵa ótinimderdi qabyldaý aıaqtalýda. Qazirdiń ózinde 40 myń qazaqstandyq ózderin qyzyqtyratyn kýrstardan ótýde, dep habarlaıdy QR Eńbek jáne halyqty áleýmettik qorǵaý mınıstrligi.

Álemdegi eń tanymal Coursera onlaın-oqytý platformasy QR Eńbek jáne halyqty áleýmettik qorǵaý mınıstrligimen (budan ári – Eńbekmıni) jáne «Eńbek resýrstaryn damytý ortalyǵy» AQ-men birlesip qazaqstandyqtar úshin tegin onlaın-bilim berýdiń aýqymdy jobasyn iske asyrýda. Joba 31 qazanǵa deıin eseptelgen, alaıda uıymdastyrýshylar arasynda kýrstarǵa tirkelý merzimin 2020 jylǵy 14 jeltoqsanǵa deıin jáne óteýsiz negizde oqý merzimin 2021 jylǵy 15 aqpanǵa deıin uzartý týraly ýaǵdalastyqqa qol jetkizildi.

Búgingi tańda 40 myńnan astam azamat 500 kýrs boıynsha bilim alýda. 17 myńnan astam qatysýshy bir mezgilde 2 jáne odan da kóp kýrstarda oqyp jatyr.

Oqytýdyń eń tanymal baǵyttary: bıznes, IT jáne kompıýterlik ǵylymdar, tilderdi oqytý, jeke damý jáne derekter týraly ǵylym boldy. 11 myńǵa jýyq qatysýshy bıznes-aǵylshyn tiliniń daǵdylaryn jaqsartýda. Python tilinde baǵdarlamalaý daǵdylaryn 7 myńnan astam adam meńgeredi. Qazaqstandyqtar SMM negizderin oqytýdy, jobalarmen jumys jasaýda Agile jáne Scrum paıdalanýdy, Adobe Photoshop, ómir isin izdeý negizderin jáne kásipkerlik daǵdylardy jıi tańdaıdy.

Kýrstarda oqıtyndardyń eń kóp sany (9,6 myń adam) 31-den 40 jasqa deıingi jas sanatyna kiredi. Budan keıin 26-30 jas aralyǵyndaǵy toptar – 8,5 myń qatysýshy, 21-25 jas aralyǵyndaǵy toptar – 8 myń, 20 jasqa deıingi toptar – 6 myń oqýshy.

Búgingi tańda 8 myńnan astam qatysýshy oqýdy sátti aıaqtap, sertıfıkat aldy.

Esterińizge sala keteıik, Coursera bilim berý platformasy álemniń jetekshi kompanııalary men ýnıversıtetterinen (GOOGLE, IBM, Facebook, Stanford University, Yale University, Johns Hopkins University, Princeton University jáne t.b.) 4 myńnan astam tegin kýrstardan ótýge biregeı múmkindik beredi. Atalǵan kýrstarda túrli daǵdylardy, sonyń ishinde matematıkalyq, kommýnıkatıvtik, kásipkerlik, baǵdarlamalaý, statıstıkalyq taldaý, derekterdi basqarý jáne kóshbasshylyq daǵdylaryn meńgerýge bolady.

Aǵymdaǵy jylǵy 14 jeltoqsanǵa deıin Elektrondyq eńbek bırjasy arqyly ótinim bergender jáne www.coursera.org platformasynda tirkelgenin rastaǵandar úshin Coursera alańynda tegin oqytý kýrstary 2021 jylǵy 15 aqpanǵa deıin qoljetimdi.