Coursera platformasy qazaqshalanady jáne kýrstar tegin bolady – Saıasat Nurbek

ASTANA. QazAqparat – Álemdegi joǵary oqý oryndary men stýdentterge arnalǵan «Coursera» kýrstar platformasy endi qazaq tiline aýdarylady jáne tegin bolmaq. Bul týraly Ǵylym jáne joǵary bilim mınıstri Saıasat Nurbek málim etti, dep habarlaıdy QazAqparat tilshisi.

«Coursera» álemdegi eń úlken platforma. Onda 177 joǵary oqý orny 11 myńǵa jýyq kýrstaryn júktegen. Biraq, arzan emes, bir jyldyq lıtsenzııasynyń quny 400 AQSh dollary kóleminde. Ótken jyly Prezıdent AQSh-qa sapary barysynda atalǵan kompanııa basshylyǵymen kezdesip, yntymaqtastyq máselesi sóz boldy. Sodan soń AQSh-qa jumys babymen men bardym. Kezdesý barysynda platforma basshylyǵy Qazaqstanǵa jyldyq lıtsenzııany 199 dollardan bereıik dedi. Biraq, ol jerdegi barlyq aqparat pen kýrstar tek aǵylshyn tilinde. Sondyqtan otandyq joǵary oqý oryndarymen keńese kele, bizge qajet degen 654 kýrsty suryptap, olardy qazaq tiline aýdaraıyq degen usynys bildirdik. Tańdap alynǵan kýrstar elimizde múldem nemese durys oqytylmaıdy. Biz osy bastamamen «Qazaqstan halqyna» qorynan qarjylandyrý boıynsha qoldaý suradyq», - dedi Saıasat Nurbek tilshi Nartaı Aralbaıulynyń bergen suhbatynda.

Mınıstrdiń aıtýynsha, «Qazaqstan halqyna» qory bólgen qarajat kýrs lıtsenzııalaryn alýǵa jumsalady.

«Coursera» kompanııasymen kelisim júrgizip, platforma kýrstaryn qazaqshaǵa aýdarýǵa kóndirdik. Qazaq tiline aýdarýǵa kelsek, atalǵan kompanııanyń Qazaqstanǵa eksklıýzıvti seriktestigi bar eken, ol ulttyq aýdarma bıýrosy. Endi kýrstar tegin bolady»,- deıdi ol.

Eske salaıyq, ótken jyly Memleket basshysynyń AQSh-qa resmı sapary barysynda 100 myń qazaqstandyq stýdent Coursera kýrstaryna qol jetkizetini belgili bolǵan edi.