Coursera-daǵy kýrstardyń 40%-y qazaq tilinde qoljetimdi
ASTANA. KAZINFORM — Coursera platformasynda qazaq tilinde qoljetimdi kýrstar sany 8 myńnan asty. Bul — ondaǵy barlyq kýrstyń shamamen 40%-yn quraıdy.
Mundaı derekti Halyqaralyq «Qazaq tili» qoǵamy men OpenAI kompanııasynyń birlesken jobasynyń nátıjelerin tanystyrý kezinde Bilim Upskill kompanııasynyń atqarýshy dırektory Ásel Muhametjanova aıtty.
Onyń sózinshe, «Coursera — qazaq tilinde» jobasy 2023 jyly «Qazaqstan halqyna» qoǵamdyq qorynyń qoldaýymen bastaý alǵan. Jobaǵa alǵashqy bolyp elimizdiń óńirlerindegi 25 ýnıversıtet qosylǵan.
— Bizdiń basty maqsatymyz — stýdentterge álemniń úzdik ýnıversıtetteri men kompanııalary ázirlegen sapaly bilimdi qazaq tilinde alýǵa múmkindik jasaý. Biz tek Almaty men Astanamen shektelmeı, barlyq oblysty qamtydyq. Sebebi sapaly bilim adamnyń turatyn jerine baılanysty bolmaýy kerek, — dedi Ásel Muhametjanova.
Onyń málimetinshe, jobanyń alǵashqy jylynda 102 kýrs qazaq tiline aýdarylyp, 4,5 myńǵa jýyq kýrsqa qazaqsha sýbtıtr qosyldy. 2024 jyly bastamaǵa Ǵylym jáne joǵary bilim mınıstrligi qoldaý kórsetip, jobaǵa qatysatyn joǵary oqý oryndarynyń sany 93-ke jetti. Sol jyly taǵy 20 kýrs qazaq tiline aýdaryldy.
Al 2025 jyldan bastap Coursera kýrstaryna qazaq tilindegi dýblıaj engizildi. Sondaı-aq qazaq tili platformadaǵy kontent aýdarylatyn 40 tildiń qataryna qosyldy.
— Bul neni bildiredi? Endi qazaq tilindegi kontentti tek bizdiń komanda ǵana aýdarmaıdy. Jańa kýrstar Coursera tehnologııalary arqyly da qazaq tilinde qoljetimdi bolady. Búginde jobaǵa 100 ýnıversıtet qatysady, — dedi kompanııanyń atqarýshy dırektory.
Ásel Muhametjanovanyń sózinshe, jobanyń maqsaty kýrstardy qazaqshaǵa aýdarýmen ǵana shektelmeıdi. Coursera kýrstary qazaqstandyq ýnıversıtetterdiń oqý baǵdarlamalaryna engizilip, stýdentterdiń nátıjesi akademııalyq kredıt retinde eseptelinedi.
Úsh jylda 267 myńnan astam adam keminde bir kýrsty aıaqtap, 600 myńǵa jýyq sertıfıkat alǵan. Onyń 140 myńnan astamy qazaq tilindegi kýrstar boıynsha berilgen. Sondaı-aq Coursera kýrstary boıynsha 211 myńnan astam akademııalyq kredıt eseptelgen.
Onyń dereginshe, qazaqstandyq ýnıversıtetter de Coursera platformasyna óz kontentin shyǵaryp jatyr. Qazir 18 otandyq ýnıversıtettiń 40 avtorlyq kýrsy platformada jarııalanǵan. Onyń jartysy qazaq tilinde. Bul kýrstarǵa 15 myńnan astam stýdent tirkelip, 11 myńnan astam sertıfıkat berilgen.
Aıta keteıik, buǵan deıin Qazaqstan Coursera sheshimi negizinde ulttyq tsıfrlyq bilim berý platformasyn quratyny habarlanǵan edi.
