Túrkistan oblysynda sýǵa ketken eki adamnyń biriniń denesi tabyldy
TÚRKІSTAN. KAZINFORM — Túrkistan oblysyndaǵy Syrdarııa ózenine batyp ketken eki azamattyń biriniń denesi tabyldy. Ekinshi azamatty izdestirý jumystary jalǵasyp jatyr.
Oqıǵa 22 tamyzda Saýran aýdanyna qarasty Úshqaıyq aýyldyq okrýgi aýmaǵynda bolǵan.
Aldyn ala málimet boıynsha, eki azamat sýǵa túsýge tyıym salynǵan jerde shomylý kezinde sýǵa batyp ketken.
— Іzdestirý jumystary barysynda 2002 jyly týǵan azamattyń denesi shomylǵan jerden shamamen 6 shaqyrym qashyqtyqtan tabylyp, sýdan shyǵaryldy. Qazirgi ýaqytta 1998 jyly týǵan ekinshi azamatty izdeý jalǵasyp jatyr, — dep habarlady oblystyq Tótenshe jaǵdaılar departamenti.
Vedomstvo málimetinshe, izdestirý jumystaryna Túrkistan oblysy jáne Shymkent qalasy Tótenshe jaǵdaılar departamentteriniń qutqarýshylary, polıtsııa qyzmetkerleri, týystary men «Syrdarııa–Túrkistan» óńirlik tabıǵı parkiniń ókilderi jumyldyrylǵan.
Jalpy izdeý jumystaryna 80-nen astam adam, arnaıy tehnıka, júzý quraldary men dron tartylǵan.
Buǵan deıin Túrkistan oblysynda shomylý maýsymy bastalǵaly 17 adamnyń sýǵa ketip qaza tapqanyn jazǵan edik.
