Coupang derekteriniń taraýyna qatysty kúdiktiniń IP-mekenjaıy baqylaýǵa alyndy

ASTANA. KAZINFORM — Ońtústik Koreıa polıtsııasy dúısenbi kúni elektrondy kommertsııa alyby Coupang-taǵy derekterdiń taralýyna qatysy bar kúdiktini anyqtaý boıynsha jumys júrgizip jatqanyn, paıdalanylǵan IP-mekenjaıǵa qol jetkizilgennen keıin ony baqylaýǵa alǵanyn habarlady. Bul týraly Yonhap jazdy.

Kompanııa senbi kúni málimdegendeı, derekterdiń taralýy maýsym aıynda bastalǵan jáne onyń saldarynan 34 mıllıonǵa jýyq klıenttiń jeke aqparattary — aty-jóni, elektrondyq poshtasy, poshta mekenjaıy jáne telefon nómiri jarııalanyp ketken.

Aqparatta qylmysker retinde Qytaı azamaty, kompanııanyń burynǵy qyzmetkeri anyqtalǵany, onyń Ońtústik Koreıadan ketkeni aıtylǵan.

«Biz Coupang usynǵan server jýrnaldaryn taldap jatyrmyz», — dedi Seýl qalalyq polıtsııasynyń ókili jýrnalısterge. «Qylmys jasaǵan kúdikti qoldanǵan IP-mekenjaıdy anyqtadyq jáne ony baqylap otyrmyz».

Resmı ókildiń habarlaýynsha, polıtsııa kúdiktiniń azamattyǵyn tekserip, onyń kompanııadan ketkennen keıin elden shyǵyp ketken-ketpegenin, sondaı-aq aqparattyq júıege jasalǵan buzý áreketi týraly Kýpanga qorqytý hatyn jibergen adammen ym-jymy bir ekenin anyqtap jatyr.

Kompanııa bastapqyda shamamen 4500 adamnyń derekteriniń taralýy týraly habarlaǵannan keıin polıtsııa ótken aıda ishki tergeý bastaǵan.

Ótken aptada kompanııa aqparattyq-kommýnıkatsııalyq jelige zańsyz kirý deregi boıynsha belgisiz tulǵaǵa shaǵym túsirgennen keıin resmı tergeý bastaldy.

Polıtsııa ókili derekterdiń taralýyna baılanysty daýystyq fıshıng nemese sms-fıshıng oqıǵalary tirkelmegenin, biraq osyndaı jaǵdaılarǵa daıyndalý úshin tıisti mınıstrliktermen birlesip jumys júrgizilip jatqanyn aıtty.

Eske sala ketsek, Ońtústik Koreıada jeke derekterdiń tarap ketýinen 33,7 mln paıdalanýshy zardap shekkenin jazdyq.