Counter-Strike oıynynda jeńiske jetken qazaqstandyq komanda 1 mln dollar aldy

Bul jaıynda Dýman Jumadilov Feısbýktegi paraqshasynda jarııa etti, dep habarlaıdy QazAqparat.

«Bizdiń komanda úshin maqtanamyn ári qýanyshtymyn. Ádettegideı qazaqstandyqtardyń halyqaralyq arenadaǵy kez kelgen jeńisterine qýanamyn», - dep jazdy Dýman Jumadilov.

Onyń jazýynsha, mıllıarder Álisher Ýsmanov 100 mln dollarǵa Virtus Pro kompıýterlik oıynynyń kásibı komandasyn satyp alǵan. Demek bul da ınvestıtsııa salýdyń tamasha kózi bolyp otyr. Atalǵan komandanyń álemdik deńgeıdegi oıynshylary aıyna 5 myńnan 10 myń dollarǵa deıin tabys tabady.

«Jasalatyn kompıýterlik oıyndardyń bıýdjeti baıaǵyda-aq gollıvýdtyq blokbasterlerdiń shyǵystarynan da asyp ketken. Al shamamen 1 mıllıonǵa jýyq adam tartylǵan Gollıvýd  AQSh-tyń barlyq avtomobıl ónenrkásibi nemese aýyl sharýashylyǵynan da mol tabys pen salyq túsiredi. Al kompıýterlik oıyndar úshin tipti úlken túsirilim pavılondary nemese qymbat kamera men qural-jabdyq kerek emes. Tek kreatıvti ıdeıa bolsa bolǵan. Sizderden de Call of duty sagasyn jasaǵandaı dúnıe kútiledi. Bul oıynnan túsken tabys  10 000 000 000 dollarǵa jaqyn», - dedi Dýman Jumadilov. 

Onyń paıymynsha, kompıýterlik tehnologııalarǵa qarjy quıyp, balalarǵa arnalǵan kompıýterlik jáne aqparattyq mamandandyrylǵan mektepter, robot tehnıkasy mektepterin ashý qajet.

«Bizdiń zeınetaqy qarjymyzdy osyndaı mektepter men ýnıversıtetterge salsa jaqsy bolar edi. Aıyna 100 dollardan kem zeınetaqy alatyn zeınetkerlerimiz úshin sonshalyqty aýyr ári qynjyltatyndaı jaıt bolmas edi», - dedi ol.