Cot Qaırat Nurtastyń apellıatsııalyq shaǵymyn qanaǵattandyrmady

ASTANA. KAZINFORM — 15 kúnge qamalǵan ánshi Qaırat Nurtas (Aıdarbekov — red.) apellıatsııalyq shaǵym túsirdi. Alaıda sot apellıatsııalyq shaǵymdy qanaǵattandyrmady.

Buǵan deıin ákimshilik quqyqbuzýshylyqtar jónindegi mamandandyrylǵan aýdanaralyq sot qaýlysymen tanymal ánshi usaq buzaqylyq jasaǵany úshin 15 táýlik merzimge ákimshilik qamaýǵa alynǵan bolatyn.

Búgin Astana qalalyq sotynda Qaırat Aıdarbekovke qatysty ákimshilik quqyq buzýshylyq týraly is apellıatsııalyq tártippen qaraldy.

Birinshi satydaǵy sot Qaırat Aıdarbekovtyń ushaq ishinde janjaldasý kezinde azamat Asylbek Bekqaıyrovqa qol jumsap, onyń densaýlyǵyna jeńil zııan keltirip, tóbeles kezinde balaǵat sózder aıtqanyn anyqtady.

«Quqyq buzýshynyń advokaty qaýlymen kelispeı, 434-baptyń 2-bóligi boıynsha shaǵymdanyp, quramnyń bolmaýyna baılanysty sottan is júrgizýdi toqtatýdy surady. Qaýlynyń kúshin joıý úshin negiz anyqtalmaǵandyqtan apellıatsııanyń 2024 jylǵy 9 shildedegi qaýlysymen birinshi satydaǵy sottyń sot aktisi ózgerissiz qaldyryldy. Qaýly zańdy kúshine endi», — dep habarlady QR Joǵarǵy sotynyń baspasóz qyzmeti.

Eske sala ketsek, «Almaty-Astana» baǵytyndaǵy áýe reısinde usaq buzaqylyq jáne densaýlyqqa qasaqana jeńil zııan keltirý faktisi boıynsha ákimshilik is qozǵalǵan edi.

Astana qalasynyń ákimshilik ister boıynsha mamandandyrylǵan soty Qaırat Nurtastyń buzaqylyq isi boıynsha qaýly shyǵardy.

Buǵan deıin sot otyrysynyń qalaı ótkeni baıandalǵan bolatyn.

Keıingi kezde elimizge tanymal mádenıet salasynyń ókilderi mádenıetsizdik tanytyp, qamaýǵa alynǵany qoǵamdy eleń etkizgeni ras. Ádette toıda júretin ánshilerdiń temir tordyń ar jaǵynan tabylýy áleýmettik jelilerde qyzý talqyǵa túsip jatqanyn jazǵan bolatynbyz.