Cot balalaryn terezeden laqtyryp jibergen anany qylmystyq jaýapkershilikten bosatty
PAVLODAR. KAZINFORM - Sot sheshimimen áıel adam mamandandyrylǵan tıptegi psıhıatrııalyq statsıonarǵa májbúrlep emdeýge jiberiletin boldy.
Balalaryn terezeden laqtyryp, artynan óz de sekirgen anaǵa qatysty qylmystyq is Pavlodar oblystyq qylmystyq ister jónindegi mamandandyrylǵan aýdanaralyq sotynda jabyq rejımde qaraldy.
Qylmystyq is eki bap boıynsha qaraldy. Atap aıtqanda QR Qylmystyq kodeksiniń QK-niń 99-baby 3-bóligi – «Jas balany óltirý» jáne 24-baptyń 3-bóligi, 99-baptyń 3-bóligi – «Jas balany óltirýge áreket jasaý». Birinshi baptyń sanktsııasy ómir boıyna bas bostandyǵynan aıyrýdy kózdegenimen, ol Qazaqstandaǵy áıelderge taǵaıyndalmaıdy. Sot anany qylmystyq jaýapkershilikten tolyqtaı bosatty.
- QR Qylmystyq kodeksiniń 99-baby 3-bóliginde, 24-baby 3-bóliginde kózdelgen, qoǵamdyq qaýipti qylmysty jasaý kezinde aqyl-esi durys bolmaýyna baılanysty qylmystyq jaýapkershilikten bosatylsyn. Aıyptalýshyǵa qarqyndy baqylanatyn mamandandyrylǵan tıptegi psıhıatrııalyq statsıonarda májbúrlep emdeý taǵaıyndalsyn, - dep jarııa etti sot úkimin Pavlodar oblystyq qylmystyq ister jónindegi mamandandyrylǵan aýdanaralyq sotynyń sýdıasy Janna Nyǵybaeva.
Eske sala keteıik, 30 shilde kúni Pavlodarda áıel eki balasyn terezeden laqtyryp, ózi de sekirip ketken.
Keıin áıel men eki balasynyń terezeden qulaýy boıynsha qylmystyq is qozǵaldy.
Al 1 tamyz kúni bıiktikten qulaǵan balalardyń biri kóz jumdy.
Dárigerler tiri qalǵan jetkinshektiń jaǵdaıy týraly aıtqan.
Tamyz aıynyń ortasynda jetkinshek aýrýhanadan shyqqany týraly da habarlaǵan bolatynbyz.
Zardap shekken bala Ekibastuzǵa qarasty aýyldardyń birinde turyp jatqanyn da jazǵanbyz.
Al tamyz aıynyń sońynda qatygez ana aýrýhanadan shyǵarylǵan edi.
Polıtsııa keıinirek balalaryn terezeden laqtyryp jibergen anaǵa qatysty qylmystyq isti tekserý aıaqtalǵanyn málim etti.