Qazaqstan $1,2 mlrd-tyń energetıkalyq jobalary boıynsha kelisimderge qol qoıdy
ASTANA. KAZINFORM — COP31 aıasynda Qazaqstan jańartylatyn energııa kózderin damytý jáne gaz ınfraqurylymyn jańǵyrtý boıynsha jalpy quny $1,2 mlrd bolatyn kelisimderge qol qoıdy. Sondaı-aq ulttyq pavılonda elimizdiń ekologııalyq jobalary men zamanaýı jasyl tehnologııalary tanystyryldy. Bul týraly Úkimet málimdedi.
COP31 aıasynda Oljas Bektenov Qazaqstannyń ulttyq pavılonyna da bardy. Kórme keńistiginiń tujyrymdamasy elimizdiń tabıǵı murasyn, zamanaýı ekologııalyq jobalar men bolashaq tehnologııalaryn biriktiredi. Turan jolbarystarynyń beınesindegi Úmit pen Amýr atty ınteraktıvti jasandy ıntellekt gıdteri pavılonnyń basty elementteriniń biri boldy. Sondaı-aq orman alqaptaryn qalpyna keltirý, metan qaldyqtaryn azaıtý jáne Kaspıı teńizi arqyly Eýropaǵa «jasyl» energetıka dálizin qurý jobalary usynylǵan.
Jekelegen ekspozıtsııalar lıtıı-ıondy akkýmýlıatorlardy, plastık pen avtokólik shınalaryn qaıta óńdeý, qaldyqtardan energııa óndirý jáne ónerkásiptik qaldyqty azaıtý tehnologııalaryna arnalǵan. Pavılon baǵdarlamasy Soltústik Aral teńizin qalpyna keltirý, Kaspıı ekojúıesin saqtaý, «jasyl» energetıkaǵa kóshý, kómirtegi naryqtaryn damytý jáne «jasyl» ınvestıtsııalardy tartý máselelerin qamtıdy.
Tsıfrlyq sheshimderge, onyń ishinde óńirlik kómirtegi JI- platformasyn qurýǵa, klımattyq monıtorıng júrgizýde ǵaryshtyq tehnologııalardy qoldanýǵa jáne «Kaspıı klımattyq qalqany» memleketaralyq beıimdelý júıesin damytýǵa erekshe mán beriledi.
Konferentsııanyń 31-shi sessııasy aıasynda qazaqstandyq delegatsııa jańartylatyn energııany damytý jáne gaz ınfraqurylymyn jańǵyrtý boıynsha jalpy quny shamamen $1,2 mlrd-ty quraıtyn birqatar kelisimge qol qoıdy. Qujattar Túrkistan oblysynda qýaty 150 MVt jáne Qostanaı oblysynda qýaty 1 myń MVt bolatyn jel elektr stansalaryn salýdy, sondaı-aq derekterdi qashyqtyqtan beretin 1,35 mln ıntellektýaldy gaz eseptegishterin ornatý boıynsha Aqyl Energy jobasyn júzege asyrýdy kózdeıdi. Budan bólek, qorshaǵan ortany qorǵaý salasyndaǵy halyqaralyq yntymaqtastyqty keńeıtý jónindegi qujattarǵa qol qoıyldy.
Eske sala keteıik, Premer-mınıstr Oljas Bektenov Antalıada COP31 sammıtine qatysyp jatyr. Ol Qazaqstannyń «Taza Qazaqstan» bastamasy, 2 mlrd aǵash otyrǵyzý jospary, sý qaýipsizdigi jáne jasyl energetıkany damytý baǵytyndaǵy basymdyqtaryn tanystyrdy.