COP31: Qazaqstan QaJET platformasyn iske qosýǵa daıyndalyp jatyr
ASTANA. KAZINFORM- Qazaqstan Respýblıkasynyń Ekologııa jáne tabıǵı resýrstar mınıstri A.S. Qýantyrov Ortalyq Azııa jáne Mońǵolııa boıynsha basqarýshy dırektory Ózhan Hýseın bastaǵan Eýropalyq qaıta qurý jáne damý bankiniń (EQDB) ókilderimen ekijaqty kezdesti, dep habarlaıdy mınıstrliktiń baspasóz qyzmeti.
Taraptar Qazaqstannyń QaJET ádil energetıkalyq aýysýy jónindegi ınvestıtsııalyq platformasyn iske qosý jáne ony praktıkalyq iske asyrýǵa kóshý máselelerin talqylady.
Kezdesý basynda mınıstr EQDB-ǵa Qazaqstanmen klımattyq jáne ekologııalyq reformalardy ilgeriletýdegi kópjyldyq ári jemisti yntymaqtastyǵy úshin alǵys bildirdi. Sondaı-aq parnıktik gazdar shyǵaryndylaryn azaıtý, jasyl ekonomıkany damytý jáne ulttyq klımattyq saıasatty nyǵaıtý jónindegi jobalardy qoldaýǵa qosqan úlesin atap ótti.
Áńgime barysynda taraptar strategııalyq qujattardan olardy is júzinde iske asyrýǵa kóshýdiń mańyzdylyǵyn talqylady.
Ózhan Hýseın óz sózinde Qazaqstannyń QaJET ádil energetıkalyq aýysýy jónindegi ınvestıtsııalyq platformasyna toqtaldy.
Atap aıtqanda, jańartylatyn energııa kózderin damytý, elektr jelileri men energııa saqtaý júıelerin jańǵyrtý, sondaı-aq jańartylatyn energııa kózderi negizindegi jylytý jónindegi pılottyq jobany iske asyrý baǵyttary sóz boldy.
Sonymen qatar kezdesýde Antalıadaǵy COP31 aıasynda QaJET-ti iske qosý jónindegi qujatqa qol qoıý máselesi talqylandy. Bul QaJET-ti halyqaralyq áriptesterge tanystyrýǵa, jumystyń odan arǵy baǵyttaryn belgileýge jáne platformany qurý jónindegi ýaǵdalastyqtardan ony is júzinde iske asyrýǵa kóshýge múmkindik beredi.
Mınıstr atap ótkendeı, Qazaqstannyń, EQDB-nyń jáne basqa da áriptesterdiń damý jónindegi kúsh-jigerin biriktirý ádil ári turaqty energetıkalyq aýysýǵa qosymsha serpin beredi. Bul klımattyq mindettemelerden adamdarǵa, ekonomıkaǵa jáne qorshaǵan ortaǵa paıda ákeletin naqty is-áreketterge kóshýge múmkindik beredi.
Kezdesý sońynda taraptar ózara tıimdi yntymaqtastyqty jalǵastyrý týraly ýaǵdalasty.
Osyǵan deıin Energetıka mınıstrligi men EQDB «QaJET» ınvestıtsııalyq platformasyn iske qosatyny týraly jazdyq.
