COP29 qorytyndysy: Qazaqstan jańa Ulttyq deńgeıde aıqyndalatyn úlesti ázirleýi kerek
ASTANA. KAZINFORM – Qazaqstan COP-tyń kelesi jıynyna deıin jańa Ulttyq deńgeıde aıqyndalatyn úlesti ázirleýi kerek. Bul týraly QR Ekologııa jáne tabıǵı resýrstar mınıstrligi Klımattyq saıasat departamenti Klımattyń ózgerýine beıimdelý basqarmasynyń jetekshisi Shattyq Tastemirova aıtty.
«BUU negizgi klımattyq sammıti - COP29-da Memleket basshysy Qasym-Jomart Toqaev Qazaqstan jahandyq klımattyq máselelerdi sheshýdi qoldaıtynyn jáne 2060 jylǵa qaraı kómirtegi beıtaraptylyǵyna qol jetkizýdi maqsat etip otyrǵanyn aıtty. Bul bizdiń elimiz úshin óte joǵary mejeli maqsat. Biz jaýapty organ retinde jahandyq klımattyq kelissózderge qatysyp otyramyz. Osyndaı mańyzdy kelissózderdiń biri «klımattyq qarjylandyrý boıynsha jańa kollektıvti maqsatty anyqtaý» boldy. Parıj kelisimi elderi 2035 jylǵa qaraı damýshy elderge klımattyq mindettemelerin oryndaýy úshin jylyna 300 mlrd AQSh dollaryn bólý týraly kelisimge keldi.
Qazirgi kezde bizdiń mınıstrlik aldynda jańa Ulttyq deńgeıde aıqyndalatyn úlesti (UAÚ) ázirleý mindeti tur. Ózderińiz biletindeı, Parıj kelisimi elderi ózderiniń ulttyq deńgeıde aıqyndalatyn úlesin jańartyp turýy kerek. Bizdiń buǵan deıingi UAÚ-mizde 2030 jylǵa qaraı parnıktik gazdar shyǵaryndylaryn 1990 jylǵy kórsetkishten 15 paıyz tómendetý mindeti jazylǵan. Endi kelesi ótetin COP sammıtine deıin biz jańa kezeńdi qamtıtyn UAÚ usynýymyz jáne ony kelesi jyldyń alǵashqy jartysynda tanystyrýymyz kerek», - dedi ol COP29 sammıtiniń qorytyndysyna arnalǵan baspasóz máslıhatynda.
Vedomstvo ókiliniń aıtýynsha, bıyl Parıj kelisimi elderi jyl sońyna deıin ashyqtyq boıynsha óziniń alǵashqy ekijyldyq esebin tapsyrýy tıis bolǵan. Qazaqstan alǵashqy 9 eldiń qatarynda BUU Negizdemelik konventsııasy hatshylyǵyna óz esebin tapsyrdy. Bul elimizdiń Parıj kelisimi aıasyndaǵy jumystardy jaqsy atqaryp jatqanyn, jumystyń ashyqtyq deńgeıi joǵary ekenin kórsetedi.
Buǵan deıin COP29 tóraǵalyǵy barlyq taraptardy 2035 jylǵa qaraı klımattyń ózgerýimen kúresý úshin damýshy elderdi qarjylandyrý kólemin 1,3 trıllıon dollarǵa deıin ulǵaıtýǵa shaqyrady.
