COMSATS uıymy Qazaqstandaǵy alǵashqy keńesin ótkizdi
ASTANA. QazAqparat - Almatyda ál-Farabı atyndaǵy Qazaq ulttyq ýnıversıtetinde Ońtústikte turaqty damý úshin ǵylym men tehnologııa boıynsha komıssııasynyń (COMSATS) 21-shi otyrysy ótti. Bul týraly QazAqparat ýnıversıtettiń baspasóz qyzmetine silteme jasap habarlaıdy.
Bul halyqaralyq uıym keńesiniń otyrysy Qazaqstanda jáne postkeńestik keńistikte alǵash ret ótkizilýde.
Otyrys jumysyna 30-dan astam belgili sheteldik sarapshylar, ǵalymdar jáne uıymǵa múshe elderdiń ǵylymı-zertteý ortalyqtary men joǵary oqý oryndarynyń basshylary qatysty.
«QazUÝ - álemdegi belgili ýnıversıtetterdiń biri. Biz ǵylymnyń damý bolashaǵy men jańartylǵan energııa kózderi, qorshaǵan ortany qorǵaý jáne bıotehnologııa salalaryndaǵy birlesken jumys máselelerin talqylaýdamyz. Bul tusta ýnıversıtetterdiń róli zor, biz jahandyq máselelerdi sheshý maqsatynda bas qostyq», - dedi COMSATS atqarýshy dırektory Saıed Mohammed Djýnaıd Zaıdı.
QazUÝ 2015-jyldan bastap atalmysh halyqaralyq uıymnyń TMD-daǵy jalǵyz múshesi bolyp tabylady. COMSATS-pen tandem Azııa, Afrıka, Latyn jáne Ortalyq Amerıkanyń 25 elindegi jetekshi ǵylymı jáne bilim berý ortalyqtarymen yntymaqtastyqtyń damýyna yqpal etedi.
«COMSATS-tyń ǵylymı ortalyqtarymen yntymaqtastyq ońtústiktegi ǵalymdardyń ǵylymı-tehnologııalyq zerttemelerimen tanysyp qana qoımaı, óz jetistikterimiz ben zerttemelerimizdi tanystyrýǵa, sondaı-aq turaqty damý maqsatynda tájirıbe, bilim jáne tehnologııalarmen almasýǵa biregeı múmkindik beredi», - dep atap ótti QazUÝ rektory akademık Ǵalym Mutanov.
QazUÝ «COMSATS»-tyń Qazaqstandaǵy aldyńǵy qatarly jetistikter ortalyǵy bolyp tabylady, bul óz kezeginde ýnıversıtetke birlesken bilim berý jáne zertteý jobalaryna belsendi túrde qatysýǵa múmkindik beredi. Yntymaqtastyqtyń úsh jyly ishinde QazUÝ-dyń kóptegen ǵalymdary men doktoranttary tabysty bilim alyp, taǵylymdamadan ótti.
Ótken jyly QazUÝ negizinde COMSATS jáne Islamdyq bilim, ǵylym jáne mádenıet uıymymen (ISESCO) yntymaqtastyqta uıymdastyrylǵan eki mańyzdy is-shara bolyp ótti. Atap aıtqanda, «Ýnıversıtetterde, ǵylymı-zertteý ınstıtýttarynda jáne shaǵyn bıznes kásiporyndarynda ǵylymı jáne ınjenerlik tehnıkany jóndeý jáne tehnıkalyq qyzmet kórsetý» atty ulttyq semınar jáne «Internettegi qaýipsizdik: aqparat almasý kepildikterin kúsheıtý» atty VII halyqaralyq semınar.
