Comic Con Astana-ǵa kelýshiler sany jyl saıyn kóbeıip keledi — Almaz Myrjaqypov
ASTANA. KAZINFORM — Comic Con Astana halyqaralyq festıvaline kospleı, komıks jáne pop-mádenıetke qyzyǵatyndardyń qatary jyl saıyn artyp keledi.
Kospleı baıqaýynyń júrgizýshisi Almaz Myrjaqypovtyń aıtýynsha, festıvaldiń tanymal bolýyna áleýmettik jelilerdegi jarııalanymdar men qatysýshylardyń oń pikiri aıtarlyqtaı yqpal etip otyr.
Ol Comic Con Astana búginde ortaq qyzyǵýshylyǵy bar myńdaǵan adamdy toǵystyratyn dástúrli jyl saıynǵy is-sharaǵa aınalyp kele jatqanyn atap ótti.
— Menińshe, jyl ótken saıyn festıval týraly aqparat aýyzdan aýyzǵa tarap, oǵan qyzyǵýshylyq artyp keledi.
Adamdar festıval týraly áleýmettik jeliden kórip, onyń erekshe atmosferasyna qyzyǵady. Sondyqtan bıyl kelýshiler sany kóbirek bolady dep oılaımyn. Naqty statıstıkany uıymdastyrýshylar aıtady, biraq qatysýshylardyń belsendiligi burynǵydan da joǵary, — dedi Almaz Myrjaqypov.
Onyń sózinshe, festıvaldiń aýqymy, álemge tanymal akterlermen júzdesý múmkindigi jáne túrli oıyn-saýyq baǵdarlamalary Comic Con-dy gık-mádenıet jankúıerleri úshin erekshe oqıǵaǵa aınaldyrady.
— Comic Con Astana 2026 alýan túrli baǵdarlamasymen, tanymal akterlerdiń qatysýymen jáne qatysýshylarǵa jańa múmkindikter berýimen erekshelenip otyr. Osyndaı úlken sharanyń elimizde jyl saıyn uıymdastyrylatynyna qýanyshtymyn, — dedi spıker.
Bıyl Comic Con Astana festıvali 6–9 tamyz aralyǵynda ótedi. Baǵdarlamada rekordtyq júlde qory bar kospleı baıqaýy, sheteldik qonaqtarmen kezdesýler, geımıng aımaqtary jáne otbasynyń barlyq múshesine arnalǵan túrli oıyn-saýyq sharalary qarastyrylǵan.
