Comic Con Astana festıvaline kelgen qonaqtar sany rekord ornatty
ASTANA. KAZINFORM – 9-13 shilde kúnderi Astanada ótken Comic Con Astana-2025 festıvaline 36 elden 10 myńnan astam sheteldik qonaqtar keldi. Olardyń qatarynda AQSh, Kanada, Frantsııa, Germanııa, Qytaı, Ońtústik Koreıa, Túrkııa, Taıland, Reseı, Belarýs, Ózbekstan, Qyrǵyzstan, Ázerbaıjan, Grýzııa, Moldova, Oman jáne taǵy basqa elder bar.
Aıta keteıik, 2019 jyly negizi qalanǵan Comic Con Astana az ýaqytta Ortalyq Azııadaǵy eń iri gık jáne pop-mádenıet festıvaline aınalyp, álemniń túkpir-túkpirinen kelgen jankúıerler men kreatorlardy bir alańda toǵystyrdy.
− Comic Con Astana festıvaline 75 myńnan astam biregeı kelýshi tirkelip, jalpy qatysýlar sany 120 myńnan asty. Bes kúnge sozylǵan sharada kórermender sany kún saıyn artyp otyrdy: birinshi kúni – 13,5 myń, ekinshi kúni – 15,5 myń, úshinshi kúni – 14,5 myń, tórtinshi kúni – 19,5 myń jáne sońǵy kúni – 12,2 myń adam keldi. Bıylǵy festıvaldiń ereksheligi – is-shara alǵash ret birden eki aýqymdy alańda: «Astana Arena» men «Barys Arenada» qatar uıymdastyryldy. Bul sheshim shara aýqymyn aıtarlyqtaı keńeıtip, kelýshilerge erekshe áser men jaıly jaǵdaı usynýǵa múmkindik berdi, − deıdi uıymdastyrýshylar.
Comic Con Astana jyl saıyn qonaqtar sany, halyqaralyq juldyzdar jáne ekonomıkalyq áseri boıynsha ósip keledi. Týrıstiń qaladaǵy bir kúndik ortasha shyǵyny 118 myń teńgeni quraıdy, al olardyń ortasha sapar uzaqtyǵy – 3 kún. Osylaısha, sheteldik qonaqtardyń kelýi arqyly elorda men jalpy el ekonomıkasyna 3,5 mıllıard teńgeden astam túsim túsedi dep boljanǵan. Bul mundaı aýqymdy sharalardyń Qazaqstannyń mádenı jáne ekonomıkalyq damýyna úlken úles qosatynyn kórsetedi.
Comic Con Astana-2025 festıvaliniń basty hedlaınerleri qatarynda Endı Serkıs («Saqınalar ámirshisi», «Maımyldar planetasy», «Betmen»), Esaı Morales («Ozark», «Mıssııa nevypolnıma»), Skott Edkıns («Neosporımyı» fılmderiniń jalǵasy, «Doktor Strendj») boldy.
Arnaıy shaqyrylǵan qonaqtar qatarynda «Býmajnyı dom» serıalyn túsirgen rejısser Mıgel Anhel Vıvas, «Goııa» marapatynyń bes birdeı saltanatty rásimin uıymdastyrǵan prodıýser Emılıo A. Pına, tanymal vıdeoblogerler Marmok, Qewbite, Nastıa Djekson, Anton Mıls jáne álemge áıgili kospleı sheberleri ıAıa Han men Cinderys jáne basqa da kóptegen juldyzdar bar.
Festıval aıasynda Qazaqstan men Ispanııanyń alǵashqy birlesken halyqaralyq jobasy – «Bitim» (La Tregua) fılminiń tanystyrylymy ótti. Bul joba Netflix sekildi jahandyq strımıng platformasyna jáne halyqaralyq prokatqa arnalǵan.
Avtorlar alleıasynda jáne jármeńke aımaǵynda 150-den astam qazaqstandyq sýretshi men qolónershi óz jumystaryn usyndy. Olar – túrli janrlarda eńbek etetin jas talanttar. Comic Con Astana jas sýretshiler, komıks avtorlary, anımatorlar, dızaınerler men oıyn ázirleýshiler úshin úlken múmkindikterge jol ashatyn platforma retinde ózin kórsetti, sebebi olar osy jerde óz aýdıtorııasyn, seriktesterin jáne ınvestorlaryn taba alady.
Festıval baǵdarlamasy da mazmundy boldy. Qonaqtar juldyzdarmen avtograf-sessııalarǵa jáne Q&A kezdesýlerine, gık-jármeńkeler men merch-zonalarǵa, sheberlik saǵattaryna, azııalyq pop-mádenıet aımaǵyna, geım-aımaqqa, sondaı-aq júzdegen fan-aktıvti sharalarǵa qatysa aldy. Basty sahnada shamamen 200 daryndy kospleer qatysqan halyqaralyq baıqaý ótti. Júlde qory – 15 mıllıon teńge. Bul Comic Con Astana festıvaliniń TMD keńistigindegi eń iri kospleı alańdarynyń biri ekenin taǵy da dáleldedi.
Comic Con Astana – aımaqtaǵy eń iri gık-festıval ǵana emes, týrızm men qalalyq bıznesti damytý quraly, qazirgi jastar mádenıetin keń aýdıtorııaǵa tanytýdyń tásili, ári ártúrli urpaqtardy biriktiretin kópir.
− Comic Con-ǵa kelýshiler kóbinese otbasymen keledi. Bul – ata-analarǵa balalarynyń qyzyǵýshylyqtaryn túsinip, sol mádenıetti birge sezinýge múmkindik beredi. Bizdiń festıval – jastar mádenıetin kópshilikke tanystyrýdyń joly. Sonymen qatar, jas avtorlar men kreatorlarǵa ózin kórsetýge múmkindik alańy. Ata-analar úshin bul – balalardyń neni unatatynyn kórýdiń, olardyń qyzyǵýshylyqtarymen ortaqtasýdyń joly», – deıdi festıvaldiń bas prodıýseri Natalıa Abrashkına.
Aldyn ala baǵalaý boıynsha, Comic Con Astana-2025 festıvaliniń jalpy medıalyq qamtýy 200 mıllıon adamnan asty. Bul Astananyń Eýrazııadaǵy kreatıvti astana retindegi bedelin taǵy bir márte dáleldedi. Qala pop-mádenıet jankúıerleri úshin álemdik tartylys ortalyǵyna aınalyp keledi.