Comic Con Astana festıvaline qandaı álemdik juldyzdar keledi
ASTANA. KAZINFORM — Elordada 6-9 tamyz aralyǵynda halyqaralyq Comic Con Astana festıvali ótedi. Aýqymdy is-sharanyń hedlaınerleriniń biri — brıtanııalyq ári ıspandyq akter Taz Skaılar, dep habarlaıdy Astana ákimdiginiń resmı saıty.
Akterge Netflix platformasyndaǵy One Piece serıalynda Sandjı rólin somdaǵannan keıin tanymal bola bastady.
Budan bólek, Taz Skaılar rejısser Fılıp Barantınıdiń Boiling Point («Qaınaý núktesi») fılmi men serıalynda, Cleaner («Tazalaýshy») ekshn-trıllerinde, The Kill Team («Ólim toby») áskerı dramasynda jáne Agatha Raisin («Agata Reızın») detektıvtik-komedııalyq serıalynda oınaǵan.
Skaılar akterlikpen qatar stsenarıst, rejısser jáne prodıýser retinde de eńbek etedi. Sonymen birge ekstremaldy sport túrlerimen belsendi aınalysady.
Festıval aıasynda ol basty sahnada jankúıerlerimen kezdesip, olardyń suraqtaryna jaýap beredi, sondaı-aq qoltańba taratý jáne fotosessııalarǵa qatysady.
Comic Con Astana 2026 aıasynda Qazaqstanǵa halyqaralyq Silk Way Star televızııalyq vokal baıqaýynda Ońtústik Koreıanyń atynan óner kórsetken ońtústikkoreıalyq Kandis K-pop toby da keledi.
Comic Con Astana — Ortalyq Azııadaǵy zamanaýı pop-mádenıetke arnalǵan eń iri festıval. Ol jyl saıyn kıno, serıal, anıme, komıks, beıneoıyn jáne kospleı jankúıerlerin biriktiredi. Bıyl festıval dástúrli túrde eki alańda — Barys Arena men «Alaý» muz saraıynda ótedi.
Baǵdarlamanyń mańyzdy bóligi sanalatyn halyqaralyq kospleı baıqaýynyń júlde qory 20 mıllıon teńgeni quraıdy. Comic Con Astana festıvaliniń bıletteri comicconastana.kz resmı saıtynda satylymda.
Buǵan deıin Astanada ótken BaiQymyz-2026 festıvalinde 60-tan astam qymyz óndirýshi óz ónimderin usynǵanyn jazǵanbyz.
