Comic Con Astana 2026: qatysýshylar festıvalden alǵan áserimen bólisti
ASTANA. KAZINFORM – Comic Con Astana 2026 festıvali bıyl da Qazaqstan men shetelden kelgen kospleıerler men pop-mádenıet jankúıerleriniń basyn qosty. Festıvalge qatysýshylar súıikti keıipkerleriniń keıpine enip, alǵan áserimen bólisti.
Comic Con Astana-nyń bas prodıýseri Natalıa Abrashkınanyń aıtýynsha, Comic Con Astana jyl saıyn aýqymyn keńeıtip keledi. Bıyl uıymdastyrýshylar shamamen 100 myń adam qatysady dep josparlanǵan.
— Bizdiń maqsatymyz — ár jastaǵy qonaqqa qyzyqty kontent usynyp, Comic Con Astana-ny jyl saıyn kútetin dástúrli otbasylyq festıvalge aınaldyrý, — dedi spıker.
Uıymdastyrýshylardyń bul sózin festıvalge kelgen qonaqtardyń pikiri de aıǵaqtaı túsedi.
Máselen, Petropavl qalasynyń turǵyny Baqtııar Doldybaev Comic Con Astana-ǵa alǵash ret kelip, Naruto anımesindegi súıikti keıipkeri Tobıdiń obrazyn tańdaǵan.
— Comic Con Astana 2026 festıvaline alǵash ret kelip turmyn. Naruto anımesindegi eń súıikti keıipkerim — Tobı, sondyqtan dál osy obrazdy tańdadym. Festıvalge kelýdegi basty maqsatym — «Taqtar oıyny» serıalyndaǵy súıikti akterim Nıkolaı Koster-Valdaýmen kezdesip, qoltańba alý. Kezek kóp bolady dep estidim, biraq bári joǵary deńgeıde uıymdastyrylyp, jaqsy ótedi dep senemin, — deıdi ol.
Ózbekstannan arnaıy kelgen Sabıra Ýsenova da festıvalge alǵash ret qatysyp otyr. Ol Zenless Zone Zero oıynyndaǵy Promeıa keıipkeriniń obrazyn tańdaǵan.
— Mundaı aýqymdy sharaǵa alǵash ret qatysyp otyrmyn, sodan da bolar, erekshe atmosferany sezinip, jaqsy áser alǵym keledi. Anıme mádenıetine qyzyqqanyma on jyldaı boldy. Bul joly Promeıa keıipkeriniń obrazyn tańdap, kostıýmdi arnaıy tiktirdim. Bıyl Astanadaǵy kospleı baıqaýyna qatyspaıtyn shyǵarmyn. Kelesi jyly daıyndalyp, qatysýdy josparlap otyrmyn, — dedi Sabıra Ýsenova.
Al Qaraǵandy oblysynyń Shahtınsk qalasynan kelgen Angelına Azamatova Honkai: Star Rail oıynyndaǵy Sunday keıipkeriniń obrazyn kıip kelgen. Ol da Comic Con Astana-ǵa alǵash ret qatysyp otyrǵanyn aıtyp, mundaı sharanyń erekshe áser syılaǵanyn jetkizdi.
— Men bul festıvalge alǵash ret qatysyp turmyn. Sondyqtan barynsha kóńil kóterip, jańa adamdarmen tanysyp, erekshe atmosferany sezingim keledi. Osyndaı sharaǵa daıyndalý ońaı bolǵan joq. Búgin tańǵy saǵat beste turyp, obrazymdy kıip, festıvalge ázirlendim. Ústimdegi kostıýmdi arnaıy satyp aldym. Alǵash ret qatysyp turǵandyqtan, bári men úshin erekshe áser qaldyryp jatyr, — deıdi Angelına Azamatova.
Osylaısha, Comic Con Astana túrli elderden kelgen anıme, oıyn, kıno jáne kospleı jankúıerlerin bir alańǵa jınap, olardyń shyǵarmashylyǵyn tanystyrýǵa jáne ortaq qyzyǵýshylyq aıasynda jańa baılanys ornatýyna múmkindik berip otyr.
Aıta keteıik, búgin elordada Ortalyq Azııadaǵy eń iri pop-mádenıet festıvali — Comic Con Astana 2026 bastaldy. Festıval 6-9 tamyz aralyǵynda Barys Arena men «Alaý» muz saraıynda ótip jatyr.
