Belgili akter Comic Con Astana 2026 festıvaliniń basty qonaǵy bolady
ASTANA. KAZINFORM — 2026 jylǵy 6–9 tamyz aralyǵynda Qazaqstan astanasynda kıno, serıal, komıks, beıneoıyn, anıme jáne zamanaýı pop-mádenıet jankúıerleri taǵy da bas qosady.
Comic Con Astana halyqaralyq festıvaliniń uıymdastyrýshylary ekinshi hedlaınerdiń esimin jarııalady. Ol — Netflix-tiń Eııtıro Oda mangasy negizinde túsirilgen «One Piece» serıalynda Mankı D. Lýffı rólin somdap, álemge tanylǵan meksıkalyq akter Inıakı Godoı.
Comic Con Astana festıvali bıyl besinshi ret ótedi. 2026 jylǵy 6–9 tamyz aralyǵynda Qazaqstan astanasynda kıno, serıal, komıks, beıneoıyn, anıme jáne zamanaýı pop-mádenıet jankúıerleri taǵy da bas qosady.
Netflix-tegi eń sátti premeralardyń birine aınalǵan «One Piece» serıaly jaryqqa shyqqannan keıin Inıakı Godoı óz býynynyń eń jarqyn jas akterleriniń birine aınaldy. Ol somdaǵan keıipker — jigeri muqalmaıtyn qaraqshylar tobynyń kapıtany Monkı D. Lýffı — az ýaqyttyń ishinde álemniń túkpir-túkpirindegi mıllıondaǵan kórermenniń súıispenshiligine bólendi. Akter One Piece-ten bólek «Kemeline jetpegender» jáne «Sarany kim óltirdi?» serıaldary, sondaı-aq «¡Ánimo Juventud!», «MexZombies» jáne «No abras la puerta» fılmderi arqyly da tanymal.
Comic Con Astana aıasynda Inıakı Godoı festıvaldiń basty sahnasyna shyǵyp, jankúıerlerdiń suraqtaryna jaýap beredi. Sondaı-aq avtograf jáne fotosessııalarǵa qatysady.
Buǵan deıin Comic Con Astana 2026 festıvaliniń alǵashqy hedlaıneri retinde «Taqtar talasy» serıalyndaǵy Djeıme Lannıster rólimen tanylǵan danııalyq akter Nıkolaı Koster-Valdaý jarııalanǵan edi. Akter «Qara suńqardyń qulaýy», «Aspan patshalyǵy», «Oblıvıon», «Mysyr qudaılary», «Anashym», «Bostandyqqa atylý» fılmderinde, sondaı-aq «Sońǵy aıtqany» jáne «Patsha men jaýlaýshy» serıaldarynda oınaǵan. Nıkolaı Koster-Valdaýdyń aldaǵy jobalarynyń biri — «Bolashaqqa oralý» jáne «Forrest Gamp» fılmderin túsirgen Robert Zemekıstiń jańa The Last Mrs. Parrish fılmi. Netflix-tiń bul jańa jobasynda akter Djennıfer Lopespen birge oınaıdy.
Comic Con Astana 2026 festıvaline halyqaralyq kıno juldyzdarymen qatar tanymal blogerler, kontent avtorlary jáne álemdik kospleı ındýstrııasynyń ókilderi de qatysady.
Festıvaldiń arnaıy qonaqtarynyń qatarynda:
- Kamui Cosplay — Germanııadan shyqqan, álemge tanymal shyǵarmashylyq dýet. Kúrdeli ári usaq-túıegine deıin muqııat jasalǵan kostıýmderimen erekshelenetin dýet álemdik kospleı ındýstrııasynyń kóshbasshylarynyń biri sanalady;
- SuperCrastan (Danıa Kraster) — orys tilindegi YouTube keńistiginiń eń tanymal avtorlarynyń biri, ónertapqysh ári ǵylymdy kópshilikke túsindirýshi. Іri DIY jobalar men erekshe ınjenerlik jobalardyń avtory;
- Jane Kravitz — jumbaq oqıǵalar, tergeýler jáne derekti vıdeoesselerge arnalǵan YouTube arnasynyń tanymal avtory;
- Karrambaby— Instagram men YouTube jelilerinde mıllıondaǵan aýdıtorııasy bar reseılik vıdeobloger. Sán, saıahat jáne kúndelikti ómir taqyrybynda kontent jasaıdy;
- Dobryak— mıllıondaǵan qaralym jınaǵan anımatsııalyq beınerolıkterdiń avtory, orystildi YouTube keńistigindegi eń tanymal anımatorlardyń biri;
- Dalbek — fılmder, mýltfılmder jáne anımatsııaǵa arnalǵan sholýlarymen tanylǵan qazaqstandyq bloger, oıyn-saýyq kontentiniń avtory.
2026 jyly Comic Con Astana byltyrǵydaı eki alańda ótedi. Festıvaldiń basty sahnasy men hedlaınerlermen kezdesýler Barys Arena aýmaǵynda ótedi. Al «Alaý» muz saraıy taqyryptyq aımaqtar, kompanııalar men seriktesterdiń stendteri, oıyn keńistikteri, tanystyrylymdar, ınteraktıvti baǵdarlamalar jáne qonaqtarǵa arnalǵan túrli oıyn-saýyqtar shoǵyrlanǵan aýqymdy kórme keńistigine aınalady.
Comic Con Astana festıvaliniń dástúrli baǵdarlamalarynyń biri — jyl saıyn ártúrli elderden úzdik kospleıshilerdi jınaıtyn halyqaralyq kospleı baıqaýy. Bıyl baıqaýdyń júlde qory 20 mıllıon teńge. Bul ony óńirdegi eń iri kospleı saıystarynyń qataryna shyǵarady.
Comic Con Astana osy jyldar ishinde Ortalyq Azııadaǵy zamanaýı pop-mádenıetke arnalǵan eń iri festıvalderdiń birine aınaldy. Ár jyldary festıvaldiń hedlaınerleri retinde Mads Mıkkelsen, Endı Serkıs, Pılý Asbek, Skott Edkıns, Esaı Morales, Maıkl Rýker, Shon Gann, Persı Haıns Ýaıt jáne Aleksandr Kýznetsov qatysty.
