Comic Con Astana 2026: Festıvalge alǵashqy kúni 16 myń adam qatysty
ASTANA. KAZINFORM – Bıyl Comic Con Astana alǵashqy kúnnen-aq adam kóp jınalýymen erekshelendi. Bul týraly festıvaldiń baspasóz qyzmeti habarlady.
– Birinshi kúnniń ózinde festıvalge shamamen 16 myń adam qatysty. Festıval tarıhynda alǵashqy kúni osynsha adam alǵash ret jınalyp otyr, – dep habarlady baspasóz qyzmeti.
Festıval tańerteńnen qyza tústi. Kelýshiler negizgi sahnadaǵy baǵdarlamalardy tamashalap, oıyn alańdaryn aralady. Túrli baıqaýlarǵa qatysyp, jańa jobalarmen tanysty. Al jankúıerler kópten kútken akterleri men kospleı sheberlerin kórýge múmkindik aldy.
Bıyl elordada ótip jatqan festıvalge Nıkolaı Koster-Valdaý, Pol Anderson, Inıakı Godoı jáne Taz Skaılar keldi. Festıvaldiń birinshi kúninde «Taqtar oıynyndaǵy» Djeıme Lannıster rólimen tanylǵan Nıkolaı Koster-Valdaý kórermendermen júzdesip, jankúıerlerine qoltańba berdi.
Baspasóz máslıhatynda akter Qazaqstanǵa birinshi ret kelgenin aıtyp, sapardan alǵan áserimen de bólisti.
- Qazaqstanǵa alǵash ret kelip otyrmyn. Mundaǵynyń bári qatty unady. Elderińiz keń-baıtaq eken. Ásirese ulttyq taǵamdaryńyz unady. Sonyń ishinde ettiń dámi erekshe eken. Tipti osy bir kúnniń ózinde sońǵy úsh jylda jegenimnen de kóp et jep qoıǵan shyǵarmyn, — dep kúldi akter.
Ol qazaqtyń ulttyq taǵamdarynan dám tatyp, monshaǵa barǵanyn aıtty. Báıterekke kóterilip, dástúr boıynsha alaqanyn qoıyp, tilek te tilegen.
Sonymen qosa Comic Con-ǵa kospleı áleminde tanylǵan Kamui Cosplay, Leon Chiro jáne Elizabeth Rage de qatysyp jatyr. Festıval barysynda kórermender blogerler men kontent avtorlarynyń kezdesýlerine de qatysýǵa múmkindikteri bar.
Oıyn alańdary da kúni boıy kórermenge toly boldy. Munda jańa oıyndardy baıqap kórýge, túrli tehnologııalarmen tanysýǵa jáne sheberlik sabaqtaryna qatysýǵa múmkindik jasalǵan. Jármeńkede komıks, anıme, fılmder men beıneoıyndarǵa arnalǵan túrli zattar satylyp jatyr.
Kospleı baıqaýy da alǵashqy kúnniń kópshilik kútken baǵdarlamalarynyń biri boldy. Qatysýshylar fılm, serıal, anıme, komıks pen beıneoıyndaǵy keıipkerlerdiń beınesin sahnaǵa alyp shyqty. Olardyń kóbi kostıýmin ózi tigip, usaq bólshekterine deıin qolmen jasaǵan.
Bıyl festıvalge álemniń 20-dan astam elinen qonaqtar men qatysýshylar kelgen.
Eske sala keteıik, Comic Con Astana 2026 festıvali 6-9 tamyz aralyǵynda ótip jatyr.
