Coltústik Qazaqstanda elik atqan brakoner ustaldy
SQO polıtsııa departamenti baspasóz qyzmetiniń málimetinshe, 9 naýryz kúni Taıynsha aýdanynyń polıtsııa bólimine aýyl turǵyndary habarlasyp, jaqyn mańda myltyq atylǵanyn aıtqan.
Oqıǵa ornyna birden tártip saqshylary attanyp, aýyl mańynan aýdannyń eki turǵynyn ustady. Olardyń biri - 36 jastaǵy qarý ıesi túz taǵysyn atty degen kúdikke ilindi.
Sibir eligin atyp alǵan oryn da anyqtaldy. Oqıǵa ornynan janýardyń eti, qarda júrgish kólik, 2 atylǵan gılza, tirkelgen eki uńǵyly myltyq tabyldy.
Bul derek Sotqa deıingi tergep-tekserýdiń biryńǵaı tizilimine «Zańsyz ańshylyq» baby boıynsha engizildi. Tergeý júrip jatyr.
«Bul - bıyldyqqa aýdan aýmaǵynda tirkelgen alǵashqy zańsyz ań aýlaý faktisi. Brakonerlermen kúresý úshin turaqty túrde reıd júrgiziledi. Olarǵa aýdandyq polıtsııa bóliminiń, SQO polıtsııa departamenti JPQB tabıǵatty qorǵaý polıtsııasynyń qyzmetkerleri, múddeli vedomstvolardyń ókilderi qatysady», - deıdi Taıynsha aýdany polıtsııa bóliminiń bastyǵy Nurlyjan Aqtanov.
