Coldcard osaldyǵy: 89 mln dollarlyq bıtkoınniń joǵalýyna qatysty kúdik kúsheıdi
ASTANA. KAZINFORM — Coldcard krıptoámııandarynyń ıelerine anyqtalǵan baǵdarlamalyq osaldyqqa baılanysty qarajatyn shuǵyl qorǵaý usynyldy. Atalǵan aqaý kıberqylmyskerlerge bıtkoınderdi urlaýǵa múmkindik berýi yqtımal. Bul týraly Kazinform agenttiginiń Vashıngtondaǵy menshikti tilshisi FOX Business basylymyna silteme jasap habarlady.
Galaxy Research zertteýshileriniń málimetinshe, úsh kezeńmen jasalǵan kıbershabýyldar barysynda 1200-den astam krıptoámııannan jalpy quny shamamen 89 mıllıon dollar bolatyn 1000-nan astam bıtkoın shyǵarylǵan. Alaıda mamandar zardap shekken barlyq ámııanda dál osy osal baǵdarlamalyq jasaqtama qoldanylǵany ázirge rastalmaǵanyn atap ótti.
Coldcard qurylǵylaryn óndiretin kanadalyq Coinkite kompanııasy baǵdarlamalyq qamtamasyz etýdiń jańartylǵan nusqasyn shyǵardy. Degenmen kompanııa bul jańartý osal nusqalar arqyly buryn jasalǵan sıd-frazalardy (qalpyna keltirý qupııa sóz tirkesterin) qorǵaı almaıtynyn eskertti. Osyǵan baılanysty paıdalanýshylarǵa jańartylǵan baǵdarlamany qoldanyp jańa sıd-fraza jasap, barlyq krıptoaktıvterin jańa ámııanǵa kóshirý usynyldy.
Coinkite kompanııasynyń bas dırektory Rodolfo Novak X áleýmettik jelisinde jarııalaǵan málimdemesinde kópshilikten keshirim surap, kompanııanyń «bolǵan jaǵdaıǵa qatty qapalanǵanyn» jáne mıkrobaǵdarlamadaǵy qatelik úshin tolyq jaýapkershilikti óz moınyna alatynyn aıtty.
Buǵan deıin AQSh-ta krıptovalıýtalardy retteýge arnalǵan jańa erejeler ázirlenip jatqany habarlanǵan bolatyn.
