Cointelegraph Qazaqstanda Web3 ekojúıesin damytýǵa kómektesedi
ASTANA. KAZINFORM – Jasandy ıntellekt jáne tsıfrlyq damý mınıstrligi men Cointelegraph kompanııasy ózara túsinistik týraly memorandýmǵa (MoU) qol qoıdy.
Maqsat – Qazaqstannyń aımaqtyq tsıfrlyq ınnovatsııalar ortalyǵy retindegi pozıtsııasyn nyǵaıtyp, Web3 ekojúıesin damytý.
Mınıstrlik málimetinshe, áriptestik Qazaqstannyń blokcheın, Fintech jáne jasandy ıntellekt salalaryndaǵy jetistikterine halyqaralyq qyzyǵýshylyqty arttyryp, memleket, bıznes jáne Web3 qaýymdastyǵy arasyndaǵy yntymaqtastyqty damytýǵa jol ashady.
Cointelegraph kompanııasynyń jahandyq seriktestik jónindegi jetekshisi Djeffrı Mıllıgannyń aıtýynsha, yntymaqtastyq arqyly kompanııa damýshy elderdegi Web3 baǵytynyń damýyn qoldaýǵa daıyn.
– Qazaqstan ashyq ári ınnovatsııalyq tsıfrlyq ekonomıkany qalyptastyrýda aıtarlyqtaı jetistikke jetti. Osy áriptestik arqyly Cointelegraph halyqaralyq tájirıbesimen bólisip, medıa yntymaqtastyqty kúsheıtýge jáne jergilikti ınnovatorlardy jahandyq Web3 ekojúıesimen baılanystyrý arqyly eldiń ári qaraı damýyna úles qosýdy kózdeıdi, - dedi Djeffrı Mıllıgan.
Memorandým memlekettik organdar men bıznes ókilderine arnalǵan oqytý baǵdarlamalary men sheberlik sabaqtaryn ázirleý, birlesken zertteýler júrgizý, Qazaqstanda Web3 jáne Fintech is-sharalaryn uıymdastyrý sııaqty keń aýqymdy baǵyttardy qamtıdy. Bul ǵana emes seriktestik Qazaqstannyń tsıfrlyq transformatsııasy týraly sóz qozǵaıtyn biregeı medıa bolyp, analıtıkalyq kontent jasaýdy jáne ony Cointelegraph-tyń jahandyq platformasynda jarııalaýdy kózdeıdi.
Cointelegraph – blokcheın, krıptovalıýta jáne tsıfrlyq tehnologııalar týraly málimet taratatyn álemdegi jetekshi basylymdardyń biri. 2013 jyly qurylǵan bul medıa Web3 álemindegi basty jańalyqtar men úrdisterdi, sondaı-aq ınnovatsııa men ortalyqtandyrylmaǵan bolashaqty qalyptastyryp jatqan tulǵalar jaıly materıaldardy jarııalaıdy. Búginde Cointelegraph kompanııasynyń AQSh, Eýropa jáne Azııada keńseleri bar, al onyń aýdıtorııasy álem boıynsha mıllıondaǵan oqyrmandy qamtıdy.
Eske salsaq, Premer-mınıstr ınternet sapasyna qatysty shaǵym azaımaı otyrǵanyn aıtqan edi.