Coca-Sola jáne qoǵamdyq uıymdar 15 myń aýyl turǵynyn taza aýyz sýmen qamtamasyz etpek
ALMATY. QazAqparat - «Turaqty damýǵa kómektesý ortalyǵy» qoǵamdyq qory Coca-Cola kompanııasymen birlesip, 2011-2020 jyldarǵa «Aq Bulaq» sýmen qamtamasyz etýdi damytýdyń salalyq memlekettik baǵdarlamasyn qoldaý maqsatynda «Aýyldyq eldi mekenderge arnalǵan sapaly aýyz sý» jobasyn jasady.
Uıymdastyrýshylar alǵashqy qanatqaqty jobany Aqmola, Almaty oblystarynda 2014-2015 jyldar aralyǵynda júzege asyryp, on bes myńǵa jýyq turǵyndy taza aýyz sýmen qamtamasyz etpek.
«Qazirgi kezde sapaly sý - óte ózekti másele. 2014 jylǵy 4 sáýirde Qazaqstan Respýblıkasy Prezıdentiniń №786 Jarlyǵymen bekitilgen Qazaqstannyń 2014-2020 jyldarǵa arnalǵan sý resýrstaryn basqarý memlekettik baǵdarlamasynyń derekterine sáıkes, búgingi kúni eldegi aýyz sýmen qamtamasyz etý jaǵdaıynyń jaqsaryp kele jatqandyǵy ras. Biraq ta Qazaqstan halqynyń 67% ǵana sapaly aýyz sýmen jáne 47% ǵana káriz júıesimen qamtylǵan. Sondyqtan, máseleni sheshý úshin qoǵamdyq uıymdar da bastama kóterip otyr. Biz bıznes ókilderine, atap aıtqanda Coca-Cola kompanııasynyń osy jobaǵa qatysqandyǵyna rızamyz. Kompanııanyń aýyldyq óńirlerdiń turǵyndaryn aýyz sýmen qamtýda laıyqty úles qosatynyna senimdimiz»,- dep atap ótti «Turaqty damýǵa kómektesý ortalyǵy» qoǵamdyq qorynyń atqarýshy dırektory Vera Mustafına.
Mundaı aýqymdy jobalar tek memlekettik jáne qoǵamdyq uıymdar tarapynan ǵana iske asyrylyp qoımaı, sondaı-aq iri halyqaralyq kompanııalar tarapynan da qoldaý taýyp otyr.
«Soca-Cola kompanııasy áleýmettik bastamalarǵa basa kóńil aýdarady. Taza aýyz sýǵa qoljetimdilik - qoǵamnyń densaýlyǵy úshin óte mańyzdy. Sýǵa uqypty qaraý, ony utymdy paıdalaný jáne únemdeý, sý resýrstaryn tıimdi basqarý - bizdiń Qazaqstandaǵy jáne búkil álem boıynsha bıznes júrgizýimizdiń basymdylyqtarynyń biri bolyp tabylady.Biz ózimizdiń osy jobaǵa qatysqandymyzdy maqtan tutamyz, óıtkeni tabysty bıznes, tek salaýatty qoǵamda ǵana bolady emes pe!? Sondyqtan biz ári qaraı da osyndaı áleýmettik mańyzy bar jobalardy jan-jaqty qoldaý úshin barlyq kúsh-jigerimizdi, jınaqtalǵan tájirıbelerimiz ben bilimderimizdi salatyn bolamyz»,- dedi Ortalyq Azııa men Kavkaz elderindegi Coca-Cola kompanııasynyń úkimettik jáne qoǵamdyq baılanystar jónindegi menedjeri Oleg Pıletskıı.
