Coca-Cola kompanııasynan 74 000 qyzmetkeri týraly málimetter saqtalǵan kompıýterler urlandy
ASTANA. 25 qańtar. QazAqparat - Atlantadaǵy Coca-Cola kompanııasynyń keńsesinen onyń 74 myń qyzmetkeri týraly málimetteri bar kompıýterler joǵalyp ketti, dep jazady RBK The Wall Street Journal silteme jasap.
Birneshe noýtbýkta kompanııanyń qazirgi jáne burynǵy qyzmetkerleriniń jeke málimetteri, atap aıtqanda, áleýmettik saqtandyrý polısteriniń nómirleri, júrgizýshilik kýálikteri men poshtalyq meken-jaılary týraly aqparattar bolǵan. Kompanııa óziniń AQSh pen Kanadadaǵy qyzmetkerlerine bolǵan jaıttan habardar etetin hattar jiberip jatyr. Ondaı hat qazir 18 myń qyzmetkerge jiberildi, taǵy 56 myńy hatty jaqyn arada alady. Hatta oryn alǵan oqıǵaǵa baılanysty kompanııa atynan keshirim suralǵan. Baspasóz hatshysy Enn Mýrdyń sózine qaraǵanda, bul qyzmettik málimetterdi qastyqpen paıdalaný jaıttary tirkelgen joq. Ótemaqy retinde kompanııa qyzmetkerlerine jeke málimetterine qol suǵýdan qorǵaý baǵdarlamasyn bir jyl boıy tegin paıdalanýǵa múmkindik bermek. Qylmystyq iske Coca-Cola kompanııasynyń burynǵy qyzmetkerleriniń qatysy bar, degen boljam bar. Atamysh mekemede qazir oqıǵa boıynsha qyzmettik tekserý jumystary júrgizilip jatyr.
