«Coca-Cola Bylǵary dop-2011» fýtbol týrnıriniń 6-maýsymy Eýropanyń dástúrli «Kúz-Kóktem» nusqasy boıynsha ótedi
ASTANA. 11 tamyz. Qazaqparat - Qazaqstannyń jasóspirimder sportynyń sátti jobalarynyń biri bıyldan bastap jańasha ótpek. «Coca-Cola Bylǵary dop 2011» fýtbol týrnıriniń 6-maýsymy Eýropanyń dástúrli «Kúz-Kóktem» nusqasy boıynsha ótetin bolady.
«Coca-Cola Bylǵary dop» fýtbol meıramy qazaqstandyq oqýshylar ómiriniń ajyramas bóligine aınaldy. 2006 jyldan beri ol elimizdiń balalary arasynda ótkiziletin eń iri fýtbol jarysy bolyp tabylady. Osy ýaqyt aralyǵynda týrnır birtalaı jetistikterge jetti. Eger buryndary jarystarǵa Qazaqstannyń tek iri qalalarynyń oqýshylary ǵana qatyssa, endi respýblıkalyq jarysqa elimizdiń túkpir-túkpirinen jınalyp qatysatyn balalar sany kúnnen kúnge artýda. Ótken maýsymda jarysqa búkil Qazaqstannyń, atap aıtqanda Batys Qazaqstan, Soltústik Qazaqstan, Aqtóbe, Almaty, Aqmola, Qaraǵandy, Jambyl, Qostanaı, Shyǵys Qazaqstan, Mańǵystaý, Ońtústik Qazaqstan, Pavlodar, Atyraý, Qyzylorda oblystary jáne Astana men Almaty qalalarynyń 5 000 mektepterinen 350 000 oqýshy qatysty. Ótken jyldarǵa qaraǵanda, týrnırdiń demeýshisi «Koka-Kola» kompanııasy 2010 jylǵy maýsymnan bastap, barlyq jas sanattary boıynsha fınaldyq oıyndar kezinde qatysýshylardy tegin tamaqtandyryp, turatyn jermen qamtamasyz etedi.
2011-2012 maýsymy «Coca-Cola Bylǵary Dop» damýynda jańa beles bolary anyq. Qazaqstan táýelsizdiginiń 20 jyldyq mereıtoıyna oraı, qazaqstandyq sporttyń halyqaralyq sahnada artyp kele jatqan dańqyn eskere otyryp, týrnırdi Eýropalyq «Kúz-Kóktem» standarty boıynsha ótkizý sheshimi qabyldandy. Týrnırdiń birinshi - toptyq bóliminde jarystyń toptyq kezeńi ótkiziledi, irikteý týrynyń jeńimpazdary biri birimen kelesi jyldyń kókteminde pleı-off kezeńinde kezdesetin bolady. Uıymdastyrýshylar mamyr aıyna qaraı barlyq jas sanattary - kishi (2000-2001 jj. týǵandar), orta (1998-1999 jj. týǵandar) jáne joǵary (1996-1997 jj. týǵandar) jastyq toptardyń fınaldyq kezdesýlerin ótkizýdi josparlap otyr.
Jeńimpaz ataǵy men bedelinen basqa, joǵary jastaǵy toptaǵy chempıon komandaǵa 2012 jyly eń áıgili evropalyq fýtbol alańdarynyń birine barý sııaqty qosymsha syılyq usynylady. Bul 30-dan artyq elderdiń komandalary qatysatyn jáne bıyldan beri qazaqstandyq «Coca-Cola Bylǵary Dop» fýtbol týrnırin quramyna biriktirgen halyqaralyq Copa Coca-Cola (Kopa Koka-Kola) balalar-jasóspirimder týrnıriniń arqasynda múmkin bolyp otyr.
«Coca-Cola Bylǵary Dop» týrnıri qazirgi tańda myńdaǵan qazaqstandyq uldar úshin úlken sport álemine aparar týra jol bolyp tabylady, - dep atap ótti Qazaqstannyń fýtbol federatsııasynyń bas hatshysy Saıan Hamıtjanov. - Osyndaı oılardyń jáne balalardyń ataqty, kúshti, ózine senimdi azamat bolý armandary iske asyrylyp jatqany bizdi asa qýantady. Bul - Qazaqstan sportynyń bolashaǵy, qazirdiń ózinde «Coca-Cola Bylǵary Dop» oıyndaryna qarap otyryp, biz qazaqstandyq sport pen Qazaqstan qoǵamynyń bolashaq kóshbasshylaryn kóre alamyz».
