Climatescope: Qazaqstan jańartylatyn energııa boıynsha pozıtsııasyn jaqsartty
ASTANA. KAZINFORM — Sońǵy jyldary Qazaqstan taza energııaǵa ınvestıtsııalar tartý tartymdylyǵyn baǵalaıtyn halyqaralyq Climatescope reıtınginde aıtarlyqtaı ilgerileýshilik kórsetti, dep habarlaıdy Energetıka mınıstrliginiń baspasóz qyzmeti.
Respýblıka damýshy naryqtar arasynda 2017 jylǵy 54-orynnan 2025 jyly 24-orynǵa kóterildi. Bul jańartylatyn energetıkanyń belsendi damýyn jáne ınvestıtsııalyq ortanyń jaqsarǵanyn kórsetedi.
Qazaqstan pozıtsııasynyń ósýi jańartylatyn energetıka jobalaryna ınvestıtsııa kóleminiń artýymen baılanysty. Elde JEK-ti qoldaý saıasaty, sonyń ishinde aýktsıondar jáne «jasyl» energııany kepildi satyp alý tetikteri belsendi túrde engizilip jatyr.
Qazaqstan taza energetıkany damytý jolynda mańyzdy qadamdar jasap keledi.
— Investorlardyń qyzyǵýshylyǵynyń artýy jáne naryqtyq jaǵdaılardyń jaqsarýy respýblıkanyń tómen kómirtekti tehnologııalar úshin kapıtal tartý boıynsha óńirdegi kóshbasshylardyń birine aınalǵanyn aıǵaqtaıdy. Qazaqstan naryǵyna TotalEnergies, China Power, Masdar jáne China Energy sııaqty álemdik alpaýyttar keldi. 2035 jylǵa deıingi uzaq merzimdi perspektıvada elde 8 GVt-tan astam JEK qýatyn iske qosý josparlanǵan, bul ulttyq energııa júıesiniń turaqtylyǵyn jáne energııa teńgeriminiń ártaraptandyrylýyn qamtamasyz etedi, — delingen habarlamada.
Climatescope elderdi negizgi kórsetkishter boıynsha baǵalaıdy: ınvestıtsııa deńgeıi, ınfraqurylym, saıası qoldaý jáne naryqtyq múmkindikter. Qazaqstan osy kórsetkishterdiń barlyǵy boıynsha turaqty jaqsarý tendentsııasyn kórsetip otyr, bul «jasyl» ekonomıkany damytý jáne halyqaralyq jobalardy iske asyrý úshin jańa perspektıvalar ashady.
Osyǵan deıin Energetıka mınıstrligi qaıtarymdy ınvestıtsııalar lımıtin ulǵaıtýdy josparlap otyrǵanyn jazǵan edik.
