CQO-da jetim balalarǵa tıesili úılerde basqa adamdar zańsyz turyp kelgen
PETROPAVL. KAZINFORM — Soltústik Qazaqstan oblysynyń prokýrorlary ata-ananyń qamqorynsyz qalǵan balalardyń quqyqtaryn qorǵady.
SQO prokýratýrasynyń málimetinshe, ata-ana qamqorlyǵynsyz qalǵan balalar múlkiniń saqtalýyna ýákiletti organdar jaýapty. Alaıda qadaǵalaýshy organnyń tekserisi barysynda óreskel zań buzý anyqtaldy.
Aıyrtaý aýdanynda Balalardy qoldaý ortalyǵy ornalasqan. Munda qazir Lobanovo aýylyndaǵy turǵyn úıde úlesi bar kámeletke tolmaǵan alty bala tárbıelenip jatyr.
Ýákiletti organ ózine júktelgen mindetti tolyq oryndamaǵan, ıaǵnı uzaq ýaqyt boıy múliktiń ne jaǵdaıda turǵanyn bilmegen.
Saldarynan bul turǵyn úıge 2024 jyldyń tamyzynan bastap zańdy negizsiz beıtanys adam qonystanǵan.
Mamlıýt aýdanynda «Turǵyn úı qatynastary týraly» zańnyń talaptaryn buza otyryp, jetim balalarǵa arnalǵan 2 kommýnaldyq páterde basqa adamdar turyp kelgen.
Al, Aqjar aýdanyndaǵy Balalardy qoldaý ortalyǵy tárbıelenýshisiniń ákesi qaıtys bolǵannan keıin oǵan oblystaǵy aýyl sharýashylyǵy kásiporyndarynyń birinde jer úlesi qalǵan.
Quryltaı qujattaryna sáıkes kámeletke tolmaǵan adamnyń bank shotyna jyl saıyn áleýmettik kómek (paılyq dıvıdendter) kelip túsýi tıis. Alaıda, ýákiletti organ tarapynan baqylaýdyń bolmaýyna baılanysty 2024 jyly tólem jetim balanyń banktik shotyna túspegen.
Prokýrorlardyń aralasýynan keıin jetim jáne ata-ana qamqorlyǵynsyz qalǵan balalardyń quqyǵy qorǵaldy.
Buǵan deıin SQO-nyń burynǵy turǵyny qos azamattyqpen júrgenin jazǵan edik.