CQO-da shetelderden kelgender arasynda koronavırýs kóp anyqtalýda

PETROPAVL. QazAqparat – Soltústik Qazaqstan oblysynda shetelderden kelgen adamdardyń arasynda KVI jaǵdaılary tirkelip jatyr. Aýyrǵandar negizinen Reseıden kelgen adamdar arasynda kóp, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, 12 shildede Reseımen shekaralas avtomobıl joldaryndaǵy shekaralyq baqylaý beketteri arqyly 980 adam ótken. Jaıaý jolaýshylardyń 723-de PTR taldaýdyń teris nátıjesi kórsetilgen anyqtama bolǵan.

«Anyqtamasyz shekaradan ótpek bolǵan qazaqstandyq 16 azamat karantındik statsıonarlarǵa ornalastyrylyp, COVID-19-ǵa PTR test tapsyrdy. 2 shetel azamatyna kirýge tyıym salyndy, óıtkeni Qazaqstan Respýblıkasynyń memlekettik shekarasyn óter sátte olardyń qolynda testileýden ótkeni týraly jaramdy anyqtama bolmaǵan», - deıdi SQO sanıtarııalyq-epıdemıologııalyq baqylaý departamentiniń bas mamany Aınash Saǵandyqova.

Jalpy 2020 jyldyń 6 qazany men 2021 jyldyń 12 shilde aralyǵynda Reseımen shekaralas avtomobıl joldaryndaǵy UQK-niń shekaralyq baqylaý beketteri arqyly 182 548 adam ótken.

«Osy aralyqta ótken jaıaý jolaýshy – 84 180 adamda PTR testileýdiń teris nátıjesi kórsetilgen anyqtamalary bolǵan. Eldiń 4 742 azamaty anyqtamasyz keldi jáne COVID-19-ǵa zerthanalyq tekserý úshin karantındik statsıonarlarǵa ornalastyryldy. Nátıjesinde 308 adamnyń koronavırýsty juqtyrǵany anyqtaldy, onyń ishinde 37 adam ınfektsııalyq statsıonarǵa ornalastyryldy jáne 271 adam ambýlatorııalyq emdeýge jiberildi», - deıdi Aınash Saǵandyqova.

Mamannyń aıtýynsha, shetel azamatynyń qolynda PTR test qorytyndysy bolmasa, elge kirýge ruqsat joq. Osylaısha, 987 sheteldik azamatqa shekarany kesip ótýge tyıym salyndy.

Al vaktsınatsııalaýdyń tolyq kýrsyn alǵan azamattarǵa shekteý joq. Shetelden osyndaı 3113 qazaqstandyq kelgen. Olardyń 2320-sy jaıaý ótse, 793-i júk tasymaldaýshy.