CQO-da polıtseıler eki aı boıy qashyp júrgen qaraqshyny ustady
Soltústik Qazaqstan oblysy polıtsııa departamenti baspasóz qyzmetiniń málimetinshe, 19 mamyrda túnde eki qaraqshy Petropavldyń ortalyǵynda adamǵa shabýyl jasap, 100 myń teńgege jýyq aqshasyn tartyp alǵan. Kúdiktilerdiń biri - 20 jastaǵy qala turǵyny izi sýymaı ustaldy. Ekinshisi buryn buzaqylyq úshin sottalǵan 28 jastaǵy Beskól aýylynyń turǵyny qaladan qashyp ketken. Oǵan polıtseıler izdeý jarııalandy.
Jedel aqparat boıynsha, kúdikti Almatyda jasyrynǵan, keıin Petropavlǵa oralǵan. Tártip saqshylarynan qashyp, tanystarynyń qujattaryna resimdelgen jaldamaly páterde turyp júrgen. Alaıda qýlyǵy iske aspady. Krımınaldyq polıtsııa qyzmetkerleri onyń sońyna túsip, 20 shildede qolǵa túsirdi. Kúdikti qamaldy.
«Kúdikti «Quqyqtyq tártip» jedel-profılaktıkalyq is-sharasy ótken kezeńde ustaldy. Jalpy operatsııa ótken ýaqytta izdeýde júrgen eki qylmysker ustaldy. Jyl basynan oblys polıtseıleri qylmys jasady dep kúdiktelgen 18 adamnyń júrgen jerin anyqtady», - deıdi SQO PD krımınaldyq polıtsııa basqarmasy bastyǵynyń mindetin atqarýshy Marat Jumalıev.