CQO-da mototsıklshilerdiń jol apatynan bir adam qaıtys bolǵan
PETROPAVL. QazAqparat – Soltústik Qazaqstan oblysynda mototsıklshilerdiń jol apatyn jasaýy jıilegen. Saldarynan bir adam qaza tapty, úsheýi jaraqattanǵan, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, bıyl jaz bastalǵaly mototsıkl júrgizýshileriniń saldarynan úsh jol-kólik oqıǵasy tirkelgen.
Sonyń biri 29 maýsym kúni Petropavlda boldy. Sátpaev kóshesinde mototsıklshi bir baǵytta kele jatqan Toyota Alphard kóligimen soqtyǵysqan.
Oqıǵa ornynda jumys istegen patrýldi polıtsııa batalony qyzmetkerleri jınaǵan materıalǵa sáıkes, 23 jastaǵy mototsıkl júrgizýshisi qaýipsiz araqashyqtyqty saqtamaı, kólikke tym jaqyn kelgen.
Saldarynan jigit jáne onyń 27 jastaǵy jolaýshysy – boıjetken jaraqattandy. Ekeýi de aýrýhanaǵa jatqyzyldy. Mototsıklshiniń kólik júrgizýge quqyǵy bolmaǵan.
Osy oqıǵaǵa qatysty sotqa deıingi tergeý bastaldy.
«Jol qozǵalysynyń barlyq qatysýshylaryn jolda qyraǵylyq tanytyp, erekshe saq bolýǵa shaqyramyz. Mototsıkl júrgizýshileri de, olardyń jolaýshylary da motoshlem kııýi qajet. Jol qozǵalysy erejesinde mototsıklshilerge qatysty birneshe talap bar. 12 jastan tómen balalardy bul kóliktiń artqy oryndyǵynda tasymaldaýǵa bolmaıdy. Mas jolaýshyny da otyrǵyzýǵa tyıym salynǵan», - deıdi SQO PD JPQ basqarmasynyń bastyǵy Aıdyn Baımatov.
Jalpy jaz bastalǵaly CQO-da mototsıklshiler jasaǵan úsh jol-kólik oqıǵasynda bir adam qaza tapty, úsheýi jaraqattandy.
