CQO-da maıly daqyldardy óńdeıtin zaýyttyń qurylysy bastaldy

PETROPAVL. QazAqparat – Soltústik Qazaqstan oblysynda kúnbaǵys, zyǵyr, raps sekildi maıly daqyldardy óńdeıtin zaýyttyń qurylysy bastaldy, dep habarlaıdy QazAqparat tilshisi.

SQO ákimi Qumar Aqsaqalov óńirde maı ekstraktsııalaıtyn zaýyttyń qurylysy bastalǵandyǵy jóninde áleýmettik jelidegi paraqshasynda habarlady.

Jańa kásiporyn Petropavlda salynyp jatyr. «Maslodel» JShS-gi bul jobany júzege asyrýǵa 15 mlrd teńge ınvestıtsııa quıǵan. Zaýyt jylyna 370 myń tonna maıly daqyldardy óńdeı alady. 200-den astam turaqty jumys orny qurylady.

«Maı zaýyty shıkizatpen qamtamasyz etiledi, óıtkeni bizdiń oblys maıly daqyldar óndirisi boıynsha respýblıkada kósh basynda. Jyl saıyn 1 mıllıon gektar aýmaqqa egiledi - bul respýblıkadaǵy barlyq alqaptardyń úshten biri. Jańa zaýytty iske qosý arqyly biz aımaqtaǵy maıly daqyldardyń negizgi úlesin óńdeı alamyz. Sondaı-aq, kásiporyn qospajem shyǵarmaq, olar qazir basqa aımaqtardan ákelinedi», - dep jazdy Qumar Aqsaqalov.

SQO-da qazir maıly daqyldardy óńdeıtin jalpy qýaty 500 myń tonnaǵa jýyq 3 kásiporyn bar.

«Biz árdaıym eń ozyq tehnologııalardy qoldanyp, zamanaýı qondyrǵylardy satyp alamyz. Ǵ.Músirepov atyndaǵy aýdanda osyǵan uqsaq táýligine 400 tonna maıly daqyldy óńdeıtin zaýyt bar. Sondyqtan bul qurylysty ilkimdi joba dep aıta almaımyz. Biz tek keńeıip jatyrmyz. Jańa zaýyt 15 gektar aýmaqta salynyp jatyr», - deıdi kásiporynnyń bas dırektory Pavel Selıvanov.

Maıly daqyldardy óńdeıtin zaýyttyń qurylysy 2023 jyly aıaqtalady.