CQO-da kóshi-qon zańnamasyn buzǵan 142 sheteldik jaýapkershilikke tartyldy
PETROPAVL. QazAqparat – Soltústik Qazaqstan oblysynda «Mıgrant» jedel-aldyn alý is sharasy ótip jatyr. Tórt kúnniń ishinde 142 sheteldik jaýapkershilikke tartyldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Ózbekstannyń bes azamaty eńbek etýge quqyqtary bolmasa da Petropavldaǵy qurylystardyń birinde jumys istegen. Barlyǵy 1 táýlikke ákimshilik qamaqqa alý jazasyna tartyldy. Olardy zańsyz jumysqa tartqan brıgadır «Sheteldik jumys kúshin jáne eńbekshi kóship kelýshilerdi Qazaqstan Respýblıkasynyń zańnamasyn buza otyryp tartý» baby boıynsha aıyppul tóledi.
Jalpy oblysta 4 kún ishinde ózge memleketterdiń azamattaryn jumysqa zańsyz tartýdyń 12 faktisi anyqtaldy. Oblysta ruqsatsyz 48 sheteldik jumys istegen.
«Maýsymnyń 7-si men 16-sy aralyǵynda «Mıgrant» jedel-profılaktıkalyq is-sharasy ótkizilip jatyr. Osy operatsııanyń tórt kúni ishinde shetel azamattaryna qatysty kóshi-qon zańnamasyn buzýdyń 142 faktisi anyqtaldy. Buǵan deıin Qazaqstanda sheteldikterdi ákimshilik jaýapkershilikke tartýǵa moratorıı bolǵan edi. Túsindirý jumystary júrgizildi, sheteldikterdiń quqyqtyq mártebelerin retteýge ýaqyttary jetkilikti boldy», - deıdi SQO PD kóshi-qon qyzmeti basqarmasynyń bastyǵy Talǵat Ábilov.
Polıtseıler anyqtaǵan zańbuzýshylyqtardyń basym bóligi – zańsyz jumysqa turý, shaqyrylǵan sheteldikterdiń Qazaqstan aýmaǵynda bolý erejelerin buzý.
Sondaı-aq, tártip saqshylarynyń aıtýynsha, keı otandastarymyz shetelge turaqty turýǵa jınalǵan kezde Qazaqstan azamattyǵynan shyǵýdy umytady. Jaýapkershilikke tartylmas úshin QR tys jerge turaqty turýǵa shyǵý týraly ótinishpen kóshi-qon qyzmetine júginý qajet. Qyzmetkerler zańnama talaptaryn egjeı-tegjeıli túsindirip beredi.
