CQO-da qaǵaz ben kirpish shyǵarylmaq

NUR-SULTAN. QazAqparat – Soltústik Qazaqstan oblysynda qaǵaz ben kirpish shyǵaratyn zaýyttar salynyp jatyr. Bul týraly Soltústik Qazaqstan oblysynyń ákimi Qumar Aqsaqalov Ortalyq kommýnıkatsııalar qyzmetindegi baspasóz máslıhatynda aıtty, dep habarlaıdy QazAqparat tilshisi.

«Soltústik Qazaqstan oblysynda ónerkásip damyp, perspektıvaly ınvestıtsııalyq jobalar júzege asyrylýda. Bul ındýstrııalyq ekonomıkany qalyptastyrýǵa múmkindik beredi. Bir jyl buryn fanera kombınaty men bıg-beg shyǵaratyn fabrıka isteı bastady. Máselen, fanera zaýyty iske qosylǵannan beri 8,5 myń tekshe metr ónim shyǵarǵan. Qazir zaýyt 100 paıyzǵa júkteldi, alda 3 aıǵa tapsyrys bar. Bıg-beg shyǵaratyn zaýyt ashylǵan kúnnen bastap 1,2 mıllıard teńgege 220 myń bıg-beg óndirdi», -dedi óńir basshysy.

Onyń atap ótýinshe, qazir oblysta kirpish zaýytynyń qurylysy aıaqtalýǵa jaqyn, ol oblystyń kirpish qajettiliginiń 30 paıyzyn óteıdi.

«Taǵy bir suranysqa ıe qurylys materıaly - avtoklavty gazdalǵan blok. Jýyrda oblys ortalyǵynda avtoklavty gazobloktar men plıtalar shyǵaratyn zaýyt paıda bolady. Petropavlda maılyq, sanıtarlyq jáne keńse qaǵazdaryn shyǵaratyn qaǵaz zaýyty salynýda. «Qyzyljar» arnaıy ekonomıkalyq aımaǵynyń aýmaǵynda elektr zaýyty men «CLAAS» aýyl sharýashylyǵy tehnıkasyn qurastyratyn kásiporyn syndy perspektıvaly ınvestıtsııalyq jobalar júzege asyrylýda», - dedi Qumar Aqsaqalov.