CQO-da bıyl 8 myńnan astam búldirshin 1-synypqa barady
PETROPAVL. QazAqparat – Soltústik Qazaqstan oblysynda bıyl 8 myńnan astam búldirshin 1-synypqa barady. Bul osydan úsh jyl burynǵy bala sanynan 13,5 paıyzǵa kóp, dep habarlaıdy QazAqparat tilshisi.
SQO ákimdiginde búgin ulttyq biryńǵaı testileýdi qorytyndylaǵan jıyn ótti.
Oblys ákimi baspasóz qyzmetiniń málimetinshe, testileýge barlyq túlektiń 72,5 %-y, ıaǵnı ár tórt oqýshynyń úsheýi qatysty. Bul – joǵary kórsetkish.
«UBT-da oblys túlekteri alǵan ortasha ball – 74,8. Respýblıkalyq kórsetkish – 69,08 ball. Bul - joǵary oqý oryndaryna túsýge jaqsy múmkindik. Bıyl jergilikti ýnıversıtetke beriletin grant sany kem degende 25 %-ǵa artyp, 4,5 myńǵa jetedi degen úmittemiz. Bul 2017 jylmen salystyrǵanda 3 ese kóp bolmaq», - dedi Qumar Aqsaqalov.
Túlekterdi óńirde ustap qalý úshin joǵary oqý ornynyń materıaldyq-tehnıkalyq bazasy jaqsartylady, eki jataqhana salynbaqshy.
Mektep oqýshylarynyń sany da artyp keledi.
«Osydan úsh jylmen salystyrǵanda bıyl jalpy oqýshy sany 4 %-ǵa artqan. Birinshi synypqa baratyn bala sany 13,5 %-ǵa kóp, ıaǵnı 8 myńnan astam búldirshin alǵash mektep tabaldyryǵyn attaıdy. Osyny eskere otyryp, biz mektepterdiń jaǵdaıyn josparly túrde jaqsartyp atyrmyz. Sońǵy eki jylda 10 mlrd teńgege 249 bilim nysany jóndeldi. Bıyl 4,3 mlrd teńgege 56 mektep kúrdeli jóndelip jatyr. Osylaısha óńirdegi barlyq mektepterdiń 63 %-ynyń jaǵdaıy jaqsarady», - dedi SQO ákimi.
Qumar Aqsaqalovtyń aıtýynsha, eki aýylda mektep qurylysy bastalmaq.
Memlekettik-jekeshelik áriptestik aıasynda Petropavlda 1200 oryndyq jańa mektep salynady.
Jalpy óńirdi keshendi damytý baǵdarlamasy boıynsha 16 mektep salý josparlanǵan.
«Nazarbaev Ýnıversıteti negizinde Petropavlda taǵy bir joǵary oqý ornyn ashýdy josparladyq. Álemdegi ozyq joǵary oqý oryndarynyń biri – Arızona ýnıversıtetimen kelissózder júrgizilip jatyr, olar akademııalyq seriktes bolýǵa qarsy emes.
Bilim berý salasyna qarjy quıý óz nátıjesin berip jatyr. Ýáde etken isterdi kezeń-kezeńmen júzege asyryp jatyrmyz. Bul básekege qabiletti, bilimdi jastardy tárbıeleý úshin mańyzdy», - dedi Qumar Aqsaqalov.
